سعودی عرب نے کہا ہے کہ ایران کے ساتھ جوہری معاہدے کی بحالی سے قبل امریکا کو خلیجی ریاستوں سے مشاورت کی جانی چاہیے۔ دوسری جانب تجزیہ کاروں نے کہا کہ ایران کے ساتھ جوہری معاہدے پر یورپ میں امریکی اتحادیوں کو خوشی ہوگی لیکن خلیجی ریاستوں کو تشویش ہے جنہوں نے تہران کے ساتھ امریکی مداخلت کو تنقید کا نشانہ بنایا ہے۔
سعودی وزیر خارجہ شہزادہ فیصل بن فرحان نے توقع ظاہر کی کہ ہم سے ایران کے ساتھ جوہری معاہدے کے معاملے میں پوری طرح سے مشورہ کیا جائے۔ انہوں نے مزید کہا کہ ہم اور ہمارے دوسرے علاقائی دوستوں سے ایران کے ساتھ مذاکرات کے موقع پر پوری طرح سے مشاورت کی جانی چاہیے۔
سعودی وزیر خارجہ نے کہا کہ 'معاہدے تکمیل تک پہنچنے کا واحد راستہ مشترکہ مشاورت ہے'۔ ایک سوال کے جواب میں انہوں نے کہا کہ ابھی تک نومنتخب امریکی صدر جوبائیڈان کے ساتھ اس معاملے پر کوئی رابطہ نہیں ہوا لیکن یہ کہ 'ہم بائیڈن انتظامیہ کے اقتدار سنبھالنے کے بعد ان کے ساتھ بات چیت کریں گے'۔
سعودی وزیر خارجہ نے کہا کہ 'ہمیں یقین ہے کہ جوبائیڈن کی آنے والی انتظامیہ سمیت یورپی ممالک سمیت ہمارے دوسرے شراکت داروں نے بھی تمام علاقائی فریقوں کو ایک قرارداد میں شامل کرنے کی ضرورت پر دستخط کیے ہیں'۔ خیال رہے کہ ڈونلڈ ٹرمپ کے سیاسی حریف اور صدارتی انتخاب میں ڈیموکریٹ کے امیدوار جوبائیڈن نے 2015 کے تاریخی معاہدے کو دوبارہ بحال کرنے کا وعدہ کیا تھا۔
مزید پڑھیں:
'آئندہ ہفتے تک دستیاب ہوجائے گی کووڈ کی ویکسین'
واضح رہے کہ امریکا کے صدر ڈونلڈ ٹرمپ نے ایران کے ساتھ جوہری معاہدے سے 2018 میں دستبرداری کا اعلان کیا تھا جس کا مقصد خطے میں ایران کو اپنی سرگرمیوں کو محدود کرنے اور میزائل پروگرام سے دستبرداری تھا۔ دوسری جانب ایران نے امریکی حملے میں قدس فورس کے سربراہ کی ہلاکت کے بعد عالمی طاقتوں کے ساتھ 2015 میں کیے گئے جوہری معاہدے سے مکمل طور پر دستبرداری کا اعلان کردیا تھا۔بعدازاں ایران نے نومنتخب امریکی صدر جو بائیڈن سے کہا تھا کہ اگر وہ تہران پر عائد اقتصادی پابندیاں ختم کردیں تو ایران 2015 کے جوہری معاہدے کی مکمل پاسداری کرے گا۔
