فرانس نے انٹر نیشنل کرمنل کورٹ (آئی سی سی ) کے پراسیکیوٹراور ان کے آفس کے ایک عملہ پر امریکہ کی جانب سے عائد اقتصادی پابندیوں کی شدید مذمت کی ہے۔
فرانسیسی وزیر خارجہ ژاں یوس لی ڈریان نے ایک بیان میں کہا ہے کہ 'دو ستمبر کواعلان کردہ اقدامات کی وجہ سے آئی سی سی اورمعاہدۂ روم پر دستخط کرنے والے ممالک پر سنگین حملہ ہوا ہے'۔
ژاں یوس لی ڈریان نے کہا ہے کہ 'اس کے علاوہ کثیرالجہتی اورعدلیہ کی آزادی کے لئے بھی چیلنج پیدا ہوگیا ہے'۔
انہوں نے امریکی حکومت سے آئی سی سی افسران کیخلاف تعزیراتی اقدامات کو واپس لینے کی اپیل کی۔
- مزید پڑھیں: فرانسیسی خاتون بھارتیوں کی مدد میں مصروف
خیال رہے امریکہ نے بدھ کو آئی سی سی کے پراسیکیوٹر فتو بینسودا اور ان کے دفترمیں ایک سنیئر عملہ پر امریکیوں کے خلاف جنگی جرائم کے الزامات کی تحقیقات جاری رکھنے کی پاداش میں پابندیاں عائد کردی ہیں۔
میڈیا رپورٹس کے مطابق پابندیوں میں امریکہ میں واقع یا امریکی قانون کے تحت اثاثوں کو منجمد کیا جانا بھی شامل ہے۔
