نیوزی لینڈ کے شمالی جزیرے کے متعدد حصوں میں آئے شدید ترین زلزلے کے بعد سونامی کی وارننگ جاری کردی گئی ہے۔ یہ جانکاری مقامی میڈیا نے آج دی ہے۔
میڈیا رپورٹ کے مطابق، کرماڈیک جزیرے میں گذشتہ چند گھنٹوں کے دوران کئی مرتبہ زلزلے کے تیز جھٹکے محسوس کیے گئے جن میں سے ایک کی شدت 8.1 ریکارڈ کی گئی ہے۔
'نیوزی لینڈ ہیرالڈ ' اخبار کے مطابق، لوگوں کو ساحلی علاقے خالی کرنے کے لیے کہا گیا ہے۔
امریکہ کے سونامی وارننگ سسٹم کے مطابق، ساحلی علاقوں کو تین سے 10 فٹ کی بلند سونامی لہروں کا سامنا کرنا پڑ سکتا ہے۔
زلزلے کے بعد پیسیفک سونامی وارننگ سینٹر نے وارننگ جاری کی ہے کہ زلزلے کے مرکز کے اردگرد 300 کلومیٹر کے علاقے میں سونامی کی لہریں پیدا ہو سکتی ہیں۔
یہ بھی پڑھیں: ترکی: فوجی ہیلی کاپٹر حادثہ کا شکار، 10 ہلاک، تین زخمی
خیال رہے کہ زلزلہ نیوزی لینڈ کے مشرقی شہر گسبورن سے 180 کلومیٹر دور ہوا جس کی زمین میں گہرائی تقریباً 10 کلومیٹر تھی۔
امریکی جیالوجیکل سروے کے مطابق، زلزلہ جمعرات اور جمعہ کی درمیانی شب آیا جس کی شدت 6.9 ریکارڈ کی گئی۔ تاہم مقامی ایجنسی کے مطابق اس کی شدت 8.1 تھی۔
نیوزی لینڈ کی نیشنل ایمرجنسی مینجمنٹ ایجنسی نے زلزلے کے فوری بعد ایک ٹویٹ میں کہا ہے کہ وہ اس بات کا اندازہ لگانے کی کوشش کر رہے ہیں کہ آیا 8.1 شدت کے زلزلے کے بعد سونامی کی لہریں پیدا ہوئی ہیں یا نہیں۔
اس ٹویٹ کے بعد ایجنسی کی جانب سے ایک اور بیان میں مشرقی ساحلی علاقوں میں موجود افراد کو محفوظ مقامات پر جانے کی تلقین بھی کی گئی ہے۔
