برطانوی وزیر اعظم بورس جانسن نے ہفتہ کو پریس کانفرنس کے دوران اعلان کرتے ہوئے کہا کہ کورونا وائرس کے خدشات کو دیکھتے ہوئے دوبارہ ملک میں ایک ماہ کا 'لاک ڈاؤن ' نافذ کرنے کا فیصلہ کیا گیا ہے۔ یہ لاک ڈاؤن جمعرات سے نافذ العمل ہوگا جو چار ہفتوں تک جاری رہے گا۔
ملک میں متاثرین کی تعداد دس لاکھ سے بڑھنے کے باعث برطانوی وزیر اعظم بورس جانسن نے ملک میں دوبارہ ایک ماہ کا طویل لاک ڈاؤن نافذ کرنے کا اعلان کیا ہے۔
برطانوی وزیر اعظم نے کہا کہ جمعرات سے غیر ضروری دکانیں اور ریسٹورینٹس اور بازار بند رہیں گے، تاہم موسم بہار کے برعکس سکولز، کالجز اور یونیورسٹیاں کھلی رہیں گی۔
بورس جانسن نے اپنے دفتر ٹین ڈاؤننگ سٹریٹ میں نیوز کانفرنس سے خطاب کرتے ہوئے کہا کہ وہ ان اقدامات کے باعث کاروبار پر پڑنے والے اثرات کے لیے 'انتہائی معذرت خواہ اور افسردہ ہیں'۔ لیکن انھوں نے کہا کہ حکومت نے ملازمین کی 80 فیصد تنخواہیں ادا کرنے کے نظام میں نومبر تک توسیع کر دی ہے۔
ان کا کہنا تھا کہ حالیہ لاک ڈاؤن کے تحت عائد پابندیاں دو دسمبر سے نرم ہونا شروع ہوں گی اور علاقوں میں مرحلہ وار نظام کے تحت معمولات زندگی دوبارہ بحال کیے جائیں گے۔
بورس جانس کا کہنا تھا ' ملک میں اس برس کرسمس تہوار کچھ مختلف ہو گا، شاید بہت زیادہ مختلف ہو، لیکن یہ دلی خواہش اور امید ہے کہ سخت اقدامات اپناتے ہوئے ہم کرسمس کے موقع پر ملک بھر میں خاندانوں کو ایک ساتھ اکٹھا ہونے کی اجازت دے سکیں گے۔'
گذشتہ شام متعدد قومی اخبارات پر حکومت کے منصوبے لیک ہونے کے بعد جانسن کو ہفتے کے روز یہ اعلان کرنے پر مجبور کیا گیا ۔ حالانکہ اس کا اعلان پیر کو کرنے کا منصوبہ تھا۔
واضح رہے کہ موسم بہار کے دوران اس وبا کے عروج پر برطانیہ میں یومیہ اموات ایک ہزار سے زیادہ تک پہنچ گئی تھیں۔
اس وقت یورپ کے بیشتر حصوں میں انفیکشن کی شرح تیزی سے بڑھ رہی ہے، جس کی وجہ سے بیلجیئم، فرانس اور جرمنی میں نئی طرح کے لاک ڈاؤن نافذ کرنے کا اشارہ دیا جا رہا ہے۔
تمام ماڈلز نے پیشگوئی کی ہے کہ دسمبر کے وسط میں انگلینڈ میں ہسپتالوں میں میں داخل ہونے والے مریضوں کی شرح عروج پر ہو گی اور جنوری کے شروع ہونے سے پہلے یعنی دسمبر کے آخر تک اموات میں اضافہ ہو سکتا ہے۔
