امریکہ نے عراق کے دارلحکومت بغداد کے گرین زون میں واقع اپنے سفارت خانہ پر حملے کے خدشے کے پیش نظر اسے بند کرنے کی تیاری شروع کردی ہے۔
عراقی افسر نے بدھ کو 'دی وال اسٹریٹ جرنل' کو بتایا کہ 'ہمیں بتایا گیا ہےکہ یہ دو سے تین مہینے میں سفارت خانہ کو مرحلہ وار طریقے سے بند ہونا ہے۔ امریکی فوجیوں کی واپسی کے ساتھ اسے جوڑ کردیکھا جاسکتا ہے'۔
اخبار کے مطابق امریکی وزیر خارجہ مائک پومپیو نے عراقی صدر برہم صالح اور عراقی وزیراعظم مصطفی الکاظمی کو حالیہ فون پر ہوئی بات چیت میں ممکنہ طور سے سفارت خانہ بند کرنے بارے میں وارننگ دی گئی ہے۔
امریکی سفارت خانہ کو بند کرنے کے پہلے سے ہی ابتدائی اقدامات کئے جارہے ہیں جبکہ عراق کے شمالی کردستان علاقے کے دارالحکومت اربل میں امریکی قونصلیٹ ابھی برقرار رہے گا۔
واضح رہے کہ بغداد کے سیکورٹی کے زبردست انتطامات والے گرین زون میں واقع امریکی سفارت خانہ کو اکثر نشانہ بنایا جاتا رہا ہے۔ سفارت خانہ پر میزائلوں سے حملے کرنے کے کئی واقعات سامنے آچکے ہیں۔
