امریکہ نے ایک بار پھر بھارت چین کے مابین مصالحت کی پیش کش کی

یہ پہلا ایسا موقع نہیں ہے، جب امریکہ نے بھارت چین کے سرحدی تنازع کے درمیان مصالحت کرانے کی پیش کش کی ہو۔ اس سے قبل مئی میں بھی امریکی صدر ڈونلڈ ٹرمپ نے مصالحت کی بات کہی تھی۔

امریکی صدر ڈونلڈ ٹرمپ نے جمعرات کو ایک بار پھر بھارت اور چین کے مابین سرحدی تنازع کو حل کرنے میں مدد کی پیش کش کی ہے۔

ٹرمپ نے وائٹ ہاؤس میں صحافیوں سے گفتگو کرتے ہوئے کہا کہ 'میرے علم میں ہے کہ چین اور بھارت کو اب مشکلات کا سامنا کرنا پڑ رہا ہے۔ مجھے امید ہے کہ دونوں ممالک اس بحران سے نکلنے میں کامیاب ہوجائیں گے۔ اگر ہم مدد کرسکتے ہیں تو ، ہم اسے کرنا پسند کریں گے'۔

اس سے قبل مئی میں ٹرمپ نے بھارت چین سرحدی تنازع کے مسئلہ پر ثالثی کرنے کے بارے میں بھی بات کی تھی، جسے بعد میں بھارت نے مسترد کر دیا تھا۔

وزیر خارجہ ایس جئے شنکر نے لداخ خطےمیں جاری سرحدی تنازع کے حل کے لئے 10 ستمبر کو شنگھائی تعاون تنظیم (ایس سی او) کے اجلاس میں اپنے چینی ہم منصب وانگ یی سے ملاقات کی تھی۔

ذرائع کے مطابق اس اجلاس میں بھارت نے لائن آف ایکچوول کنٹرول کے ساتھ مسلح چینی فوجیوں کے بڑے پیمانے پر جمع ہونے پر تشویش کا اظہار کیا تھا۔