پاکستان کی ایک انسداد دہشت گردی عدالت نے جماعت الدعوۃ کے تین رہنماوں کو دہشت گردی کی مالی اعانت معاملے میں قصوروار قرار دیتے ہوئے سزا سنائی ہے۔
عدالت کے جج اعجاز احمد بٹر نے اس معاملہ میں فیصلہ سناتے ہوئے جماعت الدعوۃ کے لیڈر حافظ عبدالسلام، پروفیسر ملک ظفر اقبال اور حافظ عبدالرحمان مکی کو دہشت گردانہ سرگرمیوں کے لئے پیسہ مہیا کرانے کے معاملے میں قصوروار قرار دیتے ہوئے سزا سنائی۔
عدالت نے سلام اور اقبال کو 16برس چھ مہینے جبکہ مکی کو ایک برس چھ مہینہ قید کی سزا سنائی ہے۔ اس کے علاوہ عدالت نے سلام اور اقبال پر ایک لاکھ 70ہزار روپے کا جرمانہ بھی عائد کیا ہے۔
مکی پر بیس ہزار روپے کا جرمانہ لگایا گیا ہے۔ ایسا سمجھا جاتا ہے کہ پاکستان نے ان لیڈروں پر کارروائی فائنانشیل ایکشن ٹاسک فورس (ایف اے ٹی ایف) کی پابندیوں سے بچنے کے لئے کی ہے۔
خیال رہے کہ فروری میں انسداد دہشت گردی عدالت نے ممبئی حملوں کے ماسٹر مائنڈ حافظ سعید کو دہشت گردانہ سرگرمیوں کے لئے فنڈ مہیا کرانے کا قصوروار قراردیتے ہوئے گیارہ برس کی سزا سنائی تھی۔
