طالبان نے افغانستان کے 10ویں شہر غزنی پر قبضہ کرنے کا دعویٰ کیا ہے۔ بین الاقوامی ذرائع ابلاغ کے مطابق افغانستان کے ایک اعلیٰ عہدیدار نے بتایا کہ 'طالبان نے کابل سے 150 کلومیٹر کی دوری پر واقع شہر غزنی پر آج قبضہ کرلیا ہے'۔
طالبان کے ترجمان ذبیح اللہ مجاہد ٹویٹ کیا کہ 'طالبان نے صوبائی دار الحکومت غزنی پر اپنا قبضہ کرلیا ہے، غزنی میں گورنر آفس، پولیس ہیڈ کوارٹرز اور جیل سب کچھ طالبان کے کنٹرول میں آگئے ہیں'۔ اس سے قبل گزشتہ روز طالبان نے بدخشاں کے دارالحکومت فیض آباد پر بھی قبضہ کر لیا تھا۔ طالبان اب تک افغانستان کے 10 صوبوں کی دار الحکومتوں پر قبضہ کر چکے ہیں۔
افغان میڈیا کے مطابق افغان آرمی چیف جنرل ولی محمد احمد زئی کو ان کے عہدے سے برطرف کر دیا گیا ہے اور ان کی جگہ جنرل ہیبت اللہ علی زئی کی تقرری کی گئی ہے لیکن ابھی تک افغان حکومت نے اس خبر کی تصدیق نہیں کی ہے۔
دوسری جانب قندوز کے ایک مقامی رکن اسمبلی نے بدھ کو اے ایف پی کو بتایا کہ سینکڑوں افغان فوجیوں نے ہفتے کے آخر میں طالبان کے شمالی شہر پر قبضہ کرنے کے بعد قندوز کے باہر ہوائی اڈے کے قریب طالبان کے سامنے ہتھیار ڈال دیے ہیں۔
دوسری جانب طالبان نے قندوز شہر کی جیل کو توڑ کر اپنے قیدیوں کو بھی رہا کروا لیا ہے۔
