کابل: دو بم دھماکوں میں ایک شخص ہلاک، متعدد افراد زخمی

فوری طور پر کسی تنظیم نے ذمہ داری قبول نہیں کی ہے۔ مغربی کابل میں شیعہ محلے میں ایک منی وین کو دھماکے سے نشانہ بنایا گیا۔

افغانستان کے دارالحکومت کابل میں دو بم دھماکوں میں ایک ہلاک اور چھ زخمی ہوگئے۔

طالبان کے ایک افسر کا کہنا ہے کہ پہلے مغربی کابل میں شیعہ محلے میں ایک منی وین کو دھماکے سے نشانہ بنایا گیا، جس میں ایک شہری ہلاک اور تین دیگر زخمی ہوئے۔ جبکہ دوسرا دھماکہ پی ڈی تھری کے ایریا میں ہوا جس میں متعدد افراد زخمی ہوگئے۔

طالبان کی زیر قیادت حکومت میں ثقافت اور اطلاعات کے نائب وزیر ذبیح اللہ مجاہد نے ایک ٹیکسٹ میسج پر دی ایسوسی ایٹڈ پریس کو بتایا کہ تحقیقات جاری ہیں۔ انہوں نے تفصیل نہیں بتائی۔

فوری طور پر کسی تنظیم نے ذمہ داری قبول نہیں کی ہے۔

اسلامک اسٹیٹ گروپ نے ہفتے کے روز ہونے والے ایک دھماکے کی ذمہ داری قبول کی جس میں ایک شخص ہلاک اور پانچ دیگر زخمی ہوئے تھے۔

گزشتہ سات دنوں میں یہ تیسرا دھماکہ ہے۔

یہ حملے ملک میں معاشی بحران کے بعد کیے گئے ہیں جس نے مختلف بین الاقوامی اداروں کو تشویش میں مبتلا کر دیا ہے۔

ڈبلیو ایف پی کے مطابق افغانستان میں 8.7 ملین افراد "قحط جیسی صورتحال" کا سامنا کرنے کے خطرے سے دوچار ہیں۔