دنیا کے 185ممالک میں پھیل چکے کورونا وائرس(کووڈ-19)کا قہر جاری ہے۔اب تک اس مہلک وائرس سے دنیا میں 30690افراد لقمہ اجل بن چکے ہیں۔جبکہ 652721 متاثر ہیں۔
ہندستان میں کورونا کا دائرہ وسیع ہوتا جا رہاہے۔ملک میں گذشتہ 24 گھنٹوں میں اس کے 149 نئے معاملے سامنے آنے کے بعد اب تک متاثرہ افراد کی تعداد 917 ہو گئی ہے۔جبکہ دو مریض کی موت کے بعد مرنے والوں کی تعداد 19 ہو گئی۔
وزارت صحت نے ہفتہ کو بتایا کہ ملک میں کورونا کے 917 معاملوں کی تصدیق ہوئی ہے۔اس عالمی وبا کے مرکز چین میں صورت حال میں بہتری آئی ہے۔اور گذشتہ 24 گھنٹوں کے درمیان 45نئے معاملے سامنے آئے ہیں۔جبکہ پانچ ا فراد کی موت ہو ئی ہے۔
چین میں اب تک81439 نتیجے مثبت پائے گئے ہیں۔اور 3300افراد کی موت ہو چکی ہے۔اس وائرس کے تعلق سے تیار کی گئی ایک رپورٹ کے مطابق چین میں ہو ئی اموات میں 80 فیصد افراد 60 سال سے اوپرکے تھے۔چین میں 81285 افراد میں کورونا کی تصدیق ہوئی ہے۔تقریبا 3287ہلاک ہو چکے ہیں۔
گذشتہ 24گھنٹوں کے درمیان کورونا سے متعلق سنگین صورت حال اٹلی اور اسپین سے سامنے آئی ہے۔عالمی وبا کورونا (کووڈ-19)سے بری طرح متاثر اٹلی میں اس انفکشن سے مرنے والوں کی تعداد دس ہزار سے تجاوز کر گئی ہے۔
اٹلی کے محکمہ شہری تحفظ کے سربراہ ، انجیلو بوریلی نے ہفتے کے روز ٹیلی ویژن کانفرنس میں بتایا کہ گذشتہ 24 گھنٹوں کے درمیان اس وائرس سے 889اموات ہوئی ہیں۔اٹلی میں کورونا انفکشن کے 3651 نئے معاملے سامنے آئے ہیں۔جس سے مجموعی تعداد 92472 ہو گئی ہے۔
اسپین میں ہلاکتوں کی تعداد 5982 ہوگئی ہے۔ تازہ ترین اعداد و شمار کے مطابق ، اسپین میں کورونا سے متاثرہ افراد کی تعداد 72،248 ہوگئی ہے۔
خلیجی ملک ایران میں کرونا وائرس نے تباہی مچائی ہوئی ہے۔ ایران میں اس وائرس سے 2517 افرادہلاک ہوچکے ہیں۔ جبکہ 35408 متاثر ہوئے ہیں۔
جنوبی کوریا میں ، حکومت نے گذشتہ کچھ دنوں کے دوران صورتحال کو کافی حد تک قابو کرنے کی کوشش کی ہے ، جس میں اسے کافی حد تک کامیابی بھی ملی ہے۔ یہاں اس وبا سے مرنے والوں کی تعداد 152 تک جا پہنچی ہے جبکہ 9583 متاثرہیں۔
یہ بیماری امریکہ میں بھی پھیل چکی ہے ، ایک ایسا ملک جس میں چینی نژاد شہریوں کی ایک بڑی تعداد ہے۔ امریکہ میں اب تک 2190 افراد کورونا وائرس کی وجہ سے ہلاک ہوچکے ہیں جبکہ 1،24،377متاثر ہوئے ہیں۔
چین کے علاوہ ، کورونا وائرس نے اٹلی ، ایران ، امریکہ اور جنوبی کوریا سمیت دنیا کے بیشترممالک کو اپنی زد میں لے لیا ہے۔ اس کے نصف سے زیادہ متاثرین اب چین سے باہر کے ہیں۔
عالمی ادارہ صحت(ڈبلیو ایچ او) کی رپورٹ کے مطابق چین کے بعد یہ مہلک وائرس اٹلی میں اپنے قدم جما چکا ہے اور یہاں کورونا سے ہونے والی اموات کی تعداد چین سے لگ بھگ دوگنی ہوگئی ہے۔ دنیا کے کچھ دوسرے ممالک میں بھی صورتحال کافی سنگین بنی ہوئی ہے۔
فرانس بھی کورونا وائرس سےشدید طور پرمتاثر ہوا ہے اور اب تک اس سے 2314 افراد لقمہ اجل بن چکے ہیں جبکہ 37،575 اس میں مبتلا ہیں۔
برطانیہ میں اب تک کورونا سے 1019 ، نیدرلینڈ میں 639 ، جرمنی 325 ، سویزرلینڈ 235 ، بیلجیئم 353 ، ترکی 108 ، برازیل 114 ، سویڈن 102 ، انڈونیشیا 102 ، پرتگال 100 ، آسٹریا 68 ، فلپائن 68 ، کینیڈا 60 ، ڈنمارک 65 ، جاپان 52 ، سویڈن 102 ، ایکواڈور48 ، عراق 42 ، مصر 36 ، یونان 32 اور ملائیشیا میں 27 افراد ہلاک ہوئے ہیں۔
ہمسایہ ملک پاکستان میں بھی کورونا وائرس کا قہر شدید ہے۔ یہاں اب تک ، 1495 افراد میں کورونا وائرس کے انفیکشن کی تصدیق ہوچکی ہے جبکہ اس سے 12ہلاک ہو چکے ہیں۔ بنگلہ دیش میں اب تک 48 افراد کےمتاثر ہونے کی خبر ہے، جبکہ پانچ اموات ہوئی ہیں۔
سری لنکا میں ، 113 افراد میں انفیکشن کی تشخیص ہوئی ہے۔ نیپال میں اب تک صرف چار متاثرہ مریضوں کا پتہ چلا ہے ، ان میں سے ایک پوری طرح صحت یاب ہو چکا ہے۔جبکہ افغانستان میں 110افراد اس سے متاثر ہے۔
مہلک کورونا وائرس پھیلنے پر تشویش کا اظہار کرتے ہوئے ، اقوام متحدہ نے اس انفیکشن کی روک تھام کے لئے ایک کروڑ پچاس لاکھ امریکی ڈالر کی امداد کی پیش کش کی ہے۔
اس فنڈ کو خصوصی طور پر ان ممالک میں استعمال کیا جائے گا جن میں صحت کی دیکھ بھال کے کمزور نظام موجود ہیں۔ ڈبلیو ایچ او نے کورونا کے خلاف لڑائی کے لئے 67 کروڑ 50لاکھ ڈالر جمع کرنے کی اپیل کی ہے۔
قابل ذکر ہے کہ گذشتہ سال دسمبر کے اواخر میں چین کے صوبہ ہوبی کے دارالحکومت ووہان سے کورونا وائرس کی شروعات ہوئی تھی۔ اب یہ دنیا کے بیشتر ممالک میں پھیل چکا ہے۔
