ماسکو میں مشترکہ پریس کانفرنس سے خطاب کرتے ہوئے وزیر خارجہ ایس جے شنکر نے افغانستان میں پرتشدد واقعات پر تشویش کا اظہار کرتے ہوئے اس کے سدباب پر زور دیا۔ انہوں نے کہا کہ تشدد سے کسی مسئلہ کو حل نہیں کیا جاسکتا۔ جے شنکر نے کہا کہ افغانستان میں رونما ہونے والے واقعات کی وجہ سے ہمسایہ ممالک میں تشویش پائی جاتی ہے۔ انہوں نے کہا کہ ہرحال میں افغانستان میں امن قائم ہونا چاہئے۔
روسی وزیر خارجہ سرگرئی لاوروف نے کہا کہ افغانستان میں طالبان کی پیش رفت سے خدشات پیدا ہوئے ہیں اور موجودہ صورتحال کے پیش نظر ماسکو نے اپنا قونصل خانہ بند کرنے کا اعلان کیا ہے۔ افغانستان کے حالات پر تشویش کا اظہار کرتے ہوئے لاوروف فوری طور پر سیاسی عمل شروع کرنے کا مطالبہ کیا۔
یہ بھی پڑھیں: طالبان کا افغانستان کے 85 فیصد علاقہ پر قبضہ کا دعویٰ
بھارتی وزیر خارجہ کے ساتھ مشترکہ پریس کانفرنس سے خطاب کرتے ہوئے سرگرئی لاوروف نے افغانستان کے تناظر میں کہا کہ جب تک مسئلہ اندرون ملک رہے گا ہم اس میں مداخلت نہیں کریں گے۔ انہوں نے کہا کہ طالبان نے ایران اور تاجکستا ن کی سرحدوں پر واقع چیک پوسٹوں پر قبضہ کرلیا ہے۔ ہم سیاسی حل پر زور دیں گے لیکن مداخلت نہیں کریں گے۔
