حافظ سعید کے خلاف درج ایف آئی آر منسوخ کرانے کی عرضی

پاکستان میں پابند شدہ تنظیم جماعت الدعوۃ کے سربراہ حافظ سعید اور 65 دیگر افراد کے خلاف ایف آئی آر کو منسوخ کرانے کے لیے لاہور ہائی کورٹ میں عرضی داخل کی گئی ہے۔

ہائی کورٹ اس عرضی پر 22 اگست کو سماعت کرے گی۔

تفصیلات کے مطابق یہ عرضی جماعت کے رکن ملک ظفر اقبال نے دائر کی ہے جس میں پاکستانی حکومت، پنجاب حکومت اور محکمہ انسداد دہشت گردی (سی ٹی ڈی) کے علاقائی ہیڈکوارٹر کو فریق بنایا گیا ہے۔

واضح رہے حافظ سعید سمیت جن 65 افراد کے خلاف ایف آئی آر درج ہے اس میں عرضی گزار ظفر اقبال کا نام بھی ہے۔

ظفر اقبال کی جانب سے داخل کردہ عرضی میں کہا گیا ہے کہ ایف آئی آر بغیر کسی قانونی حق کے درج کیا گیا ہے جس کی کوئی قانونی بنیاد نہیں ہے۔