ایران کی وزارت خارجہ کے ترجمان سعید خطیب زادہ نے امریکہ پر زور دیا کہ وہ عالمی برادری سے تعلقات کے سلسلے میں بین الاقوامی قوانین کا احترام کرے اور اپنے فرائض کی انجام دہی منصفانہ طریقے سے کرے۔
خطیب زادہ نے اپنی ہفتہ وار پریس بریفنگ میں بتایا ہے کہ 'دنیا عدم تحفظ، جنگ اور امریکی اقدامات سے سخت پریشان ہے۔ امریکہ امن کے نام پر مختلف ممالک میں بدامنی پھیلا رہا ہے'۔
وہ امریکی وزیر خارجہ مائیکل پومپیو کے تبصرے پر رد عمل کا اظہار کر رہے تھے، جنھوں نے دعوی کیا تھا کہ اقوام متحدہ کی جانب سے ایران پر مزید پابندی عائد کی جائے گی۔
خطیب زادہ نے پومپیو کے اس موقف کو ”جھوٹ سے بھری ہوئی دنیا” کے طور پر بیان کیا ہے۔
انھوں نے امریکہ کے ان اقدامات کو بربادی اور بدامنی کا باعث قرار دیا ہے۔
انہوں نے مزید کہا ہے کہ 'ایران کا واشنگٹن کے لئے پیغام یہ ہے کہ اسے عالمی برادری کے ساتھ مل کا کام کرنا چاہیے'۔
انہوں نے متنبہ کیا کہ 'ایران کی خودمختاری اور بین الاقوامی قواعد و ضوابط کی خلاف ورزی کرنے والی کسی بھی کارروائی کا سختی سے اور بغیر کسی جھجک کے معقول جواب دیا جائے گا'۔
ایرانی ترجمان نے کہا کہ امریکہ کو لازمی طور پر زمین، ہوا اور سمندر کے ذریعے کسی بھی طرح کی قزاقی کارروائیوں سے باز آنا چاہئے کیونکہ قزاقی کا دور ختم ہوچکا ہے'۔
- مزید پڑھیں: ایمی ایوارڈز 2020: ایوارڈ یافتگان پر ایک نظر
انہوں نے مزید کہا ہے کہ 'عالمی برادری کو لازما امریکہ کے خلاف متحد ہو کر کھڑا ہونا چاہئے تاکہ وہ بین الاقوامی قوانین اور ضوابط کا احترام کرے اور اپنی مجرمانہ سرگرمیاں بند کرے'۔
