پاکستان کے وزیراعظم عمران خان نے فیس بک کے سی ای او مارک زکر برگ کو خط لکھ کر مطالبہ کیا ہے کہ فیس بک سے اسلام مخالف مواد پر پابندی عائد کی جائے۔ انہوں نے کہا ہے کہ اسلامو فوبیا اور اسلام مخالف مواد پر ہولو کاسٹ جیسی پابندیاں لگائی جائیں۔
عمران خان نے کہا ہے کہ فیس بک اور دیگر سوشل میڈیا پلیٹ فارمز سے اسلامو فوبیا پھیل رہا ہے، ایسا مواد نفرت، انتہا پسندی اور تشدد کی حوصلہ افزائی کر رہا ہے۔ انہوں نے اپنے مکتوب میں لکھا ہے کہ فیس بک پر اسلام مخالف نفرت انگیز مواد پر مکمل پابندی ہونی چاہیے۔
انہوں نے کہا کہ آج دنیا میں مسلمانوں کے خلاف اسی طرح کا معاملہ دیکھ رہا ہوں، بدقسمتی سے کچھ ممالک میں مسلمانوں کو شہریت کے حقوق حاصل نہیں، مسلمانوں کو لباس سے لیکر عبادت تک سے روکا جا رہا ہے، مسلمانوں کو متعدد ممالک میں عبادت کی اجازت نہیں ہے۔
گزشتہ سال عمران خاں نے اقوام متحدہ کی 74 ویں جنرل اسمبلی میں اپنے خطاب کے دوران کہا تھا کہ "مغربی معاشرے میں ہولوکاسٹ کے ساتھ حساسیت کا سلوک کیا جاتا ہے کیونکہ اس سے یہودی برادری کو تکلیف پہنچتی ہے۔ تو یہی وہ احترام ہے جس کے لئے ہم دعا گو ہیں۔ ہمارے نبی پاک کو بدنام کرکے ہمارے جذبات کو ٹھیس نہ پہنچائیں۔ ہم صرف اتنا ہی کہتے ہیں۔''
پاکستانی وزیر اعظم کا خط پیرس میں فرانسیسی استاد کے سر قلم کرنے کے بعد فرانسیسی صدر ایمانوئل میکرون کے تبصرے کے بعد سامنے آیا ہے جب ایک کلاس کے دوران نبی کریم کے کارٹون دکھایا تھا۔ یوروپی رہنما نے "اسلام پسند علیحدگی پسندی" سے لڑنے کی بات کہی تھی۔
عمران خان نے میکرون پر طنز کرتے ہوئے کہا کہ وہ مسلسل جان بوجھ کر مسلمانوں کو مشتعل کرنے کی کوشش کر رہے ہیں۔ انہوں نے خط میں لکھا ہے کہ اسلام کو شدت پسندی کے ساتھ غلط طریقے سے جوڑا گیا ہے اور بدقسمتی سے اسلام اور پیغمبر اسلام کو نشانہ بنانے والے گستاخانہ کارٹونوں کی اشاعت کی اجازت دی گئی ہے۔
انہوں نے کہا کہ ''اس کے نتیجے میں فرانس میں مسلمانوں کو مزید پولرائزیشن اور پسماندگی کا سامنا کرنا پڑے گا۔ فرانسیسی انتہا پسند مسلم شہریوں اور اسلام کے مرکزی دھارے میں شامل مسلمان شہریوں میں کس طرح تمیز کریں گے؟
انہوں نے کہا کہ فیس بک نے 12 اکتوبر کو اعلان کیا کہ اپنی سائٹ سے وہ تمام مواد ہٹائے گا جو ہولوکاسٹ سے انکار یا اس سے بگاڑ پیدا کرتا ہے۔
