چین میں کورونا وائرس کے دوبارہ پھیلنے کے خطرات کے پیش نظر ملک کے مختلف صوبوں اور شہروں میں روک تھام اور کنٹرول کے اقدامات کو اپ گریڈ کر دیا گیا ہے۔
قومی صحت کمیشن کے مطابق کورونا وائرس کے 61 نئے کیسز کی تصدیق ہوئی ہے۔
چین کے قومی صحت کمیشن کے مطابق اب پھیلنے والا کورونا وائرس ڈیلٹا مختلف قسم کا ہے، جو انتہائی خطرناک ہے، تیزی سے انسانی جسم کے اندر منقل ہو سکتا ہے اور مریضوں کو صحت یاب ہونے میں ایک طویل وقت لگتا ہے۔
مقامی حکام نے بتایا کہ جیانگ سو صوبے کے یانگ ژو شہر میں پیر کے روز 40 نئے کیسز درج ہوئے اور 20 جولائی سے اب تک اس شہر میں 94 مقامی کیسز درج ہوئے ہیں۔
سرکاری سی سی ٹی وی کی رپورٹ کے مطابق شہر کے تمام رہائشی علاقوں کو بند کر دیا ہے، جس سے ہر خاندان میں صرف ایک شخص کو روزانہ کی ضروریات کی خریداری کے لیے باہر جانے کی اجازت ملتی ہے۔
شنگھائی کے پڈونگ ہوائی اڈے کے کارگو ایریا میں پیر کے روز غیر ملکی کارگو فلائٹ کے سروس اسٹاف میں انفیکشن پائے جانے کے بعد تمام عملے کے ارکان کی جانچ کے لیے 20 ٹیسٹنگ پوائنٹس قائم کیے گئے تھے۔
یہ بھی پڑھیں: کورونا وائرس ممکنہ طور پر انسانوں میں کسی جانور سے منتقل ہوا: عالمی ادارہ صحت
صوبہ ہوبی کے جِنگ زو شہر میں حکام نے ایک ریسیڈینشیل سب ڈسٹرکٹ کو بند کر دیا اور ضلع کے تمام باشندوں سے کہا کہ علاقے میں دو افراد میں انفیکشن کی تصدیق ہوئی ہے اس لئے سبھی لوگ جانچ کرائیں۔
