میڈیا کے مطابق کابل کے مغرب میں طلبا کو تربیت اور کورسز کے ذریعہ اعلیٰ تعلیم حاصل کرنے کیلئے تیار کرنے والے ایک تعلیمی مرکز کے قریب یہ دھماکہ خیز حملہ سہ پہر کے وقت ہوا۔ ابتدائی خبروں کے مطابق دھماکے میں 13 افراد ہلاک اور 30 زخمی ہوئے۔
افغان وزارت داخلہ کے ترجمان طارق کے حوالے سے بتایا گیا ہے کہ ’خودکش حملہ آور تعلیمی سینٹر میں داخل ہونا چاہتا تھا‘۔ سینٹر کے گارڈز نے اُسے پہچان لیا جس کی تاب نہ لاکر اُس نے باہر ہی خود کو دھماکے سے اڑا لیا۔ اب تک کسی گروپ نے حملے کی ذمہ داری قبول کرنے کا دعویٰ نہیں کیا۔
واضح رہے کہ ماضی میں بھی اس علاقے میں کئی تعلیمی اداروں اور متعلقہ مراکز کو پرتشدد حملے کا نشانہ بنایا جا چکا ہے۔ طالبان اور افغان حکومت کے درمیان جنگ ختم کرنے معاملے پر مذاکرات کے باوجود افغانستان میں حالیہ ہفتوں میں کشیدگی میں اضافہ ہوا ہے۔
ابھی پچھلے ہفتے سنیچر کو ہی کابل کے مشرق میں ایک بس کو سڑک کنارے نصب بم کا نشانہ بنایا گیا۔ اس سانحے مین 9 افراد ہلاک ہوئے تھے۔
