خلیجی ملک سعودی عرب نے اتوار کے روز کورونا وائرس کے 4 نئے کیسز کی تصدیق کی ہے۔ سعودی وزارت صحت نے اب تک مملکت میں گیارہ کیسز کی تصدیق کر دی ہے۔ سبھی متاثرین گذشتہ تقریبا 10 دنوں کے دوران ایران سے لوٹے ہیں۔
وزارت کے ایک بیان کے مطابق جن چار نئے کیسز کی تصدیق ہوئی ہے، یہ سبھی افراد سعودی شہری ہیں۔
وزارت صحت نے ایک روز قبل ہی لبنان، مصر، اٹلی اور جنوبی کوریا سے گذشتہ دو ہفتوں کے دوران مملکت میں لوٹنے والے شہریوں کو ہدایت دی تھی کہ وہ اپنی آمد کی تاریخ سے 14 روز کے لیے خود کو کسی جگہ الگ تھلگ کر لیں۔
چین کے بعد کورونا وائرس سے ایران سب سے زیادہ متاثر ممالک میں سے ہے۔ اسی وجہ سے سعودی عرب، کویت، متحدہ عرب امارات اور بحرین نے اپنے شہریوں کے ایران جانے پر پابندی عائد کردی ہے۔
سعودی عرب کی جنرل اتھارٹی برائے سول ایوئیشن نے شہریوں سے کہا تھا کہ اگر انھوں نے گذشتہ 14 روز کے دوران ایران کا سفر کیا ہے تو وہ اس کے بارے میں حکام کو مطلع کریں تاکہ حفظ ماتقدم کے طور پر وائرس سے بچاؤ کے لیے تدابیر اختیار کی جاسکیں۔
