'الیکشن جیتنے پر ایران سے بات چیت کریں گے'

امریکی صدر ڈونلڈ ٹرمپ کا کہنا ہے کہ اگر وہ نومبر کے انتخابات میں کامیابی حاصل کرتے ہیں تو ایران، امریکہ کے ساتھ ایک نیا معاہدہ کرنے کے لیے بے چین ہوگا۔

امریکہ کے صدر ڈونلڈ ٹرمپ نے فلوریڈا کے سین فورڈ میں انتخابی مہم کے جلسے میں کہا کہ 'میں گذشتہ انتظامیہ کے تباہ کن جوہری معاہدے سے پیچھے ہٹ گیا۔ الیکشن جیتنے کے بعد ممکن ہے کہ ہم پہلی بات چیت ایران کے ساتھ ہی کریں گے کیونکہ اس کی جی ڈی پی میں 28 فیصد کی کمی واقع ہوئی ہے۔'

گذشتہ ماہ کے آخر میں امریکی وزیر خارجہ مائک پومپیو نے کہا کہ وہ توقع کرتے ہیں کہ نومبر کے صدارتی انتخابات کے نتائج سے قطع نظر، امریکہ ایران کے بارے میں اپنی موجودہ پالیسی کے ساتھ عمل پیرا رہے گا۔

مسٹر پومپیو نے دعوی کیا کہ یورپی یونین کے ممالک جیسے فرانس، جرمنی اور برطانیہ ایران کے بارے میں امریکی پالیسی سے مطمئن ہیں، چاہے وہ عوامی طور پر اس کو تسلیم نہیں کرنا چاہتے ہوں۔

اہم بات یہ ہے کہ ٹرمپ انتظامیہ کے سنہ 2018 میں ایران کے ساتھ کثیر القومی جوہری معاہدے سے دستبرداری کے بعد، امریکہ نے ایران کی معیشت کے بینکوں، تیل اور دیگر شعبوں پر وسیع پیمانے پر پابندیوں کا اعلان کیا تھا۔