افغانستان پر طالبان کے قبضے کے بعد امریکہ نے تسلیم کیا ہے کہ طالبان نے ان کے اسلحے اور آلات کے ایک بڑے ذخیرے پر قبضہ کر لیا ہے۔
افغانستان سے آنے والی تصاویر اور ویڈیو میں طالبان کو اسلحے اور گاڑیوں کے ساتھ دیکھا جا سکتا ہے جو امریکی فوجیوں کے زیر استعمال رہا یا انہوں نے افغان سکیورٹی فورسز کو دیا تھا۔ اس کے علاوہ قندھار ائیر پورٹ پر امریکہ کے جدید ترین بلیک ہاک ہیلی کاپٹر اور دیگر آلات پر بھی طالبان نے قبضہ کیا۔
یہ بھی پڑھیں: اشرف غنی کو یو اے ای میں ملی پناہ
وائٹ ہاؤس کے قومی سلامتی کے مشیر جیک سیلوان نے کہا کہ ہمیں پوری طرح علم نہیں کہ افغانستان میں امریکہ کا دفاعی ساز و سامان کہاں گیا لیکن اس کا بڑا حصہ طالبان کے ہاتھ آگیا ہے۔ انہوں نے کہا کہ ہمیں احساس ہے کہ طالبان یہ ساز و سامان آسانی سے ہمیں واپس نہیں کریں گے۔
واضح رہے کہ امریکی اور نیٹو افواج کے انخلا کے ساتھ ہی طالبان گزشتہ ہفتے کے آخر میں ملک کے بیشتر حصوں پر قبضہ کرنے کے بعد اقتدار میں واپس لوٹے ہیں۔
(یو این آئی)
