وائٹ ہاؤس کی پریس سیکریٹری جین ساکی نے بتایا کہ امریکی صدر جو بائیڈن 26 اگست کو وائٹ ہاؤس میں اسرائیلی وزیراعظم نفتالی بینیٹ کی میزبانی کریں گے۔ ساکی نے بدھ کو ایک بیان میں کہا کہ "وزیر اعظم بینیٹ کا دورہ امریکہ اور اسرائیل کے درمیان پائیدار شراکت داری کو مضبوط کرے گا، ہماری حکومتوں اور ہمارے عوام کے درمیان گہرے تعلقات کی عکاسی کرے گا اور اسرائیل کی سلامتی کے لیے امریکہ کے غیر متزلزل عزم کو واضح کرے گا۔"
"صدر اور وزیر اعظم بینیٹ علاقائی اور عالمی سلامتی بشمول ایران سے متعلق اہم مسائل پر تبادلہ خیال کریں گے۔''
انہوں نے کہا کہ یہ دورہ دونوں رہنماؤں کے لیے ایک موقع ہوگا کہ وہ اسرائیل، فلسطینیوں کے لیے امن، سلامتی اور خوشحالی کو آگے بڑھانے کی کوششوں پر تبادلہ خیال کریں۔
یہ بھی پڑھیں: امریکہ ایران کو جوہری ہتھیاروں کے حصول کی اجازت نہیں دے گا: بائیڈن
وزیراعظم آفس کے ذرائع کے حوالے سے ٹائمز آف اسرائیل نے بتایا کہ بینیٹ کا دورہ کووڈ 19 احتیاطی تدابیر کی وجہ سے 48 گھنٹوں سے زیادہ رہنے کی توقع نہیں ہے۔ جون میں اقتدار سنبھالنے کے بعد شاہ عبداللہ سے ملاقات کے لیے اردن کے پہلے دورے کے بعد یہ ان کا دوسرا غیر ملکی دورہ ہوگا۔
