افریقہ کے 54 میں سے 23 ممالک میں کورونا وائرس کی تصدیق

گزشتہ دنوں بل گیٹس نے بھی ایک تقریب میں خطاب کرتے ہوئے خدشہ ظاہر کیا تھا کہ 'افریقہ میں صحت عامہ کا نظام کورونا کا مقابلہ کرنے کا متحمل نہیں، اگر کورنا کی وبا پھیل گئی تو ایک کروڑ ہلاکتیں ہوسکتی ہیں۔'

خوفناک وائرس کورونا وائرس اب افریقہ میں بھی تیزی سے پھیلنے لگاہے، مزید چار ممالک میں متاثرین کی تصدیق کی گئی ہے۔

غیر ملکی خبر رساں ایجنسی کے مطابق براعظم افریقہ کے 54 میں سے 23 ممالک میں کورونا وائرس کی تصدیق ہوچکی ہے۔

نامبیا، روانڈا، اسواتینی اور موریتانیہ میں کورنا کے کیسز سامنے آئے ہیں۔

حکام کا کہنا ہے کہ 'تمام متاثرین بیرون ملک سے سفر کرکے واپس آئے تھے۔ افریقی حکومتیں اور صحت عامہ سے متعلقہ ادارے وائرس کی روک تھام کے لیے اقدامات کررہے ہیں۔ افریقہ کی 1.3 ارب آبادی کو صحت کے کمزور انفرااسٹرکچر کی وجہ سے شدید خطرات لاحق ہوسکتے ہیں۔

نامبیا میں اسپین سے آنے والے دو متاثرین کی تصدیق کے بعد 21مارچ کو ملک میں آزادی کی تقریبات منسوخ کردی گئیں۔ موریتانیہ میں بھی حفاظتی اقدامات کے پیش نظر تعلیمی ادارے بند کردئیے گئے ہیں اور عوامی اجتماعات پر پابندی عائد کردی گئی ہے۔

ہفتے کو جنوبی افریقہ میں 14 نئے کیسز کی تصدیق کے بعد متاثرین کی مجموعی تعداد 38ہوگئی۔ جنوبی افریقہ کی فوج نے چین کے ووہان میں موجود 121طلبا کو ملک واپس لانے کی منصوبہ بندی مکمل کرلی ہے۔

ماہرین صحت کا کہنا ہے کہ 'افریقی ممالک کے ہسپتالوں میں بڑی تعداد میں انتہائی نگہداشت اور وینٹی لیٹر کی سہولیات دستیاب نہیں ہیں اس لئے خدشہ ہے کہ وائرس کے پھیلاؤ کے باعث خطہ میں زیادہ جانی نقصان ہوسکتا ہے۔

گزشتہ دنوں بل گیٹس نے بھی ایک تقریب میں خطاب کرتے ہوئے خدشہ ظاہر کیا تھا کہ 'افریقہ میں صحت عامہ کا نظام کورونا کا مقابلہ کرنے کا متحمل نہیں، اگر وائرس وبا کی صورت میں پھیل گیا ایک کروڑ ہلاکتیں ہوسکتی ہیں۔'