فلمساز فرحان اختر نے آج صبح سوشل میڈیا پر ڈان 3 کا اعلان کرکے مداحوں کے جوش و خروش میں اضافہ کردیا تھا۔ اس ویڈیو کے ذریعہ فرحان نے ڈان 3 بنانے کی خوشخبری تو دے دی لیکن انہوں نے فلم کے کاسٹ کے حوالے سے کوئی جانکاری نہیں دی۔ تاہم فلم کے اعلان کے چند گھنٹ بعد فرحان نے ایک اور اہم جانکاری شیئر کی، جس میں انکشاف کیا گیا کہ ڈان اور ڈان 2 میں مشہور کردار ادا کرنے والے شاہ رخ خان آئندہ پروجیکٹ کا حصہ نہیں ہوں گے۔SRK wont be a part of Don 3
ایک بیان جاری کرتے ہوئے فرحان نے بتایا کہ '1978 میں سلیم اور جاوید کی طرف سے تخلیق کیا گیا اور مسٹر امیتابھ بچن کے ذریعہ ادا کیے گئے ایک کردار نے ملک بھر کے شائقین کو اپنی گرفت میں لے لیا تھا۔ وہ شاندار کردار ڈان تھا۔ 2006 میں ڈان کو شاہ رخ خان نے اپنے دلکش انداز میں دوبارہ پیش کیا۔ ڈان کی حاضر جوابی سے لے کر اس کے پرسکون مزاج لیکن خطرناک غصے تک، شاہ رخ خان نے اس کی شخصیت کو اپنایا ۔ ایک مصنف اور ہدایت کار کے طور پر، میں نے شاہ رخ کے ساتھ ایک نہیں بلکہ دو 'ڈان' فلمیں بنانے کے دوران بہت اچھا وقت گزارا اور یہ دونوں تجربات میرے دل کے بہت قریب ہیں۔
حالانکہ اس پوسٹ میں فرحان نے اس نئے اداکار کے بارے میں کوئی جانکاری شیئر نہیں کی جو آئندہ فلم میں ڈان کا مشہور کردار ادا کرنے والا ہے۔ فرحان نے اپنے بیان میں مزید لکھا کہ 'اب وقت آگیا ہے کہ ڈان کی وراثت کو آگے بڑھایا جائے اور اس نئی کہانی میں ہمارے ساتھ ایک ایسا اداکار شامل ہوگا جس کی قابلیت اور ورسٹیلیٹی کا میں طویل عرصے سے دیوانہ ہوں۔ ہم امید کرتے ہیں کہ آپ اسے وہی محبت دیں گے جو آپ نے مسٹر بچن اور شاہ رخ خان کو دیا تھا۔ ڈان کا ایک نیا دور 2025 میں شروع ہوگا'۔
ڈان 3 میں شاہ رخ خان کی جگہ رنویر سنگھ کے آنے کی خبریں گردش کر رہی ہیں، تاہم ابھی تک کسی بات کی تصدیق نہیں ہو سکی ہے۔ فرحان اختر اور پروڈیوسر رتیش سدھوانی نے 1978 میں آئی فلم ڈان کے حقوق حاصل کیے، جس میں امیتابھ بچن نے اداکاری کی تھی اور اس کے ریمیک میں شاہ رخ خان اور پرینکا چوپڑا جونس نے مرکزی کردار ادا کیا تھا۔پہلی 'ڈان' فلم 2006 میں ریلیز ہوئی، اس کے بعد دوسری قسط 2011 میں ریلیز ہوئی۔
