آندھرا پردیش کے سریکاکلم ضلع میں پرائیویٹ بینکوں کے انتظامیہ نے اپنے کام کے اوقات میں کمی کر دی ہے تاکہ کورونا کے معاملات کو روکا جا سکے۔ ضلع میں حالیہ دنوں کے دوران کورونا کے معاملات میں اضافہ ہوا ہے۔
اس صورتحال کے پیش نظر بینکوں نے اپنے کام کے اوقات میں کمی کر دی ہے۔ تاہم کھاتہ دار صبح ہی سے بینکوں کے قریب قطار لگا رہے ہیں۔ رقم نکالنے، جمع کرنے کے ساتھ ساتھ دیگر کاموں کے لئے صارفین کو ناقابل بیان مشکلات کا سامنا کرنا پڑ رہا ہے۔
لوگ بینکوں کے باہر قطار لگانے پر مجبور ہیں جس سے ان کو مشکل صورتحال کا سامنا کرنا پڑ رہا ہے۔ بینکوں کے کام کے اوقات 10.30 بجے دن تا ایک بجے دوپہر تک ہیں۔ ان بینکوں کے انتظامیہ نے بینکوں کے دروازے کے باہر سینیٹائزر کی بوتلیں رکھی ہیں۔
طویل قطاروں کی وجہ سے سماجی فاصلہ کو پیچھے چھوڑا جا رہا ہے کیونکہ بیشتر افراد جلدی میں ہیں اور انہوں نے اس صورتحال پر بینک انتظامیہ پر برہمی کا اظہار کیا ہے۔
بعض صارفین نے کہا کہ وہ قطار میں صبح 9 بجے سے ٹھہرے ہوئے ہیں۔ بعض صارفین نے شکایت کرتے ہوئے کہا کہ اے ٹی ایم میں نقدی کی کمی کی وجہ سے وہ بینک سے ہی رقم نکالنے کے لئے آنے پر مجبور ہیں۔
