وزیر اعظم نریندر مودی کے پارلیمانی حلقے ریاست اترپردیش کے ضلع بنارس کے سنبھولال چوراہے پر روزاآنہ صبح کے وقت مزدوروں کی منڈی لگتی ہے، جہاں بنارس و اطراف کے علاقوں سے سینکڑوں مزدور کام کے تلاش میں آتے ہیں لیکن کورونا وائرس اور لاک ڈاؤن کی وجہ سے اب مزدوروں کو کام ملنا مشکل ہو گیا ہے، بیشتر ایسے مزدور ہیں جن کو تقریبا 15 دن سے کام نہیں ملا ہے.
مزدوروں نے اپنی پریشانیوں کا اظہار کرتے ہوئے کہا کہ اگرچہ ریاستی حکومت دعویٰ کرتی ہے کہ مزدوروں کو منریگا میں کام دیا جارہا ہے لیکن منریگا میں وقت پر مزدوری نہیں ملتی ہے، اس لیے گاؤں کے مزدور شہر کا رخ کر رہے ہیں لیکن شہر میں بھی ہفتوں بعد نصف مزدوری پر کام ملتا ہے ایسے میں زیادہ تر مزدوروں کو قرض کے سہارے اپنے گھر کو چلانا پر رہا ہے.
مزدوروں نے یہ بھی بتایا کہ گاؤں سے شہر آنے تک تقریبا ساٹھ روپے کرائے میں خرچ ہو جاتے ہیں اس کے باوجود کئی دن تک مسلسل آتے ہیں اور کام نہیں ملتا ہے، نصف مزدوری پر بھی کام کرنے کے لیے تیار ہیں. 8 گھنٹہ مزدوری کے بجائے اب بارہ گھنٹے مزدوری کرتے ہیں شدید کام لیا جاتا ہے اس کے باوجود کئی دن بعد کام ملتا ہے.
کچھ مزدور نے بتایا کہ کام نہ ہونے کی وجہ سے خالی ہاتھ ہی گھر واپس جانا پڑتا ہے، غربت اور بھوک مری اس قدر بڑھ گئی ہے کہ کام نہ ملنے کی وجہ سے اب قرض لے کر ہی گھر کا خرچہ چلانا پڑ رہا ہے. مزدوروں نے وزیر اعظم نریندر مودی سے مطالبہ کیا ہے کہ ان کے حالت زار پر بھی توجہ دیں اور اس مشکل گھڑی میں مالی تعاون کر کے ان کی پریشانیوں کو دور کریں.
