'بی جے پی کی یہ گنگا یاترا نہیں بلکہ مذاق ہے'

وارانسی میں کانگریس پارٹی نے حکومت پر لوگوں کو دھمکیاں دینے کا الزام عائد کرتے ہوئے گاندھی جی کی برسی کے موقع پر 'دستور تحفظ یاترا' نکالا ہے۔

وارانسی میں کانگریس کارکنوں نے مالدیہ سے کچہری تک ترنگا آئین تحفظ یاترا نکال کر بی جے پی پر شدید نکتہ چینی کی ہے۔ اس دوران سابق رکن پارلیمان راجیش مشرا نے کہا کہ وزیراعظم اور وزیر داخلہ جس طرح سے سی اے اے اور این آر سی سے ملکی شہریوں کے ساتھ امتیازی سلوک کر رہے ہیں یہ کانگریس پارٹی برداشت نہیں کرے گی۔

انہوں نے بی جے پی کی گنگا یاترا کے متعلق کہا کہ یہ گنگا یاترا نہیں بلکہ نوٹنکی یاترا ہے۔ انہوں نے اگر گنگا کو صاف ستھرا دکھانا ہوتا تو گنگا میں یاترا نکالتے، وہ تو سڑک پر گنگا یاترا نکال رہے ہیں۔ انہوں نے کہا کہ حکومت کی پالیسیوں کی وجہ سے مہنگائی، بے روزگاری میں اضافہ کے ساتھ ملک میں تجارت جمود و تعطل کا شکار ہوگئی ہے۔ حکومت ان امور سے عوام کی توجہ ہٹانے کے لیے یہ قانون لائی ہے۔