آج بھارت کے بیشتر حصوں میں عید الفطر منائی جارہی ہے ریاست اتر پردیش کے ضلع وارانسی میں کورونا کے سائے میں عید الفطر کی محدود تعداد میں ادا کی گئی بیشتر لوگوں نے گھروں میں نماز ادا کی، جبکہ مسجد یا عیدگاہ میں نماز ادا کرنے والوں نے کورونا کے تمام گائیڈ لائن پر پر عمل کرتے ہوئے آج عید الفطر کی نماز ادا کی۔
اس موقع پر بادشاہ باغ کے شاہی جامع مسجد کے خطیب و امام مولانا حسین احمد حبیبی نے ای ٹی وی بھارت سے بات کرتے ہوئے کہا کہ عید الفطر کی نماز کورونا گائیڈ لائین پر عمل کرتے ہوئے پوری سادگی کے ساتھ بنارس کی عوام نے ادا کی،
اس دوران پریشان حال، بیمار لوگوں کے لیے خصوصی دعائیں بھی کی گئیں، خاص طور سے فلسطینی مسلمانوں اور قبلہ اول کی حفاظت کے لیے خصوصی دعا کا اہتمام کیا گیا۔
انہوں نے کہا کہ مذہب اسلام نے پوری دنیا میں امن وسلامتی بھائی چارہ قومی یکجہتی کا پیغام دیا ہے، اس پر عمل کرتے ہوئے آج برادران وطن کے لیے دعا کی گئی، کورونا وبا کے خاتمے کے لئے دعا کی گئی۔
اس موقع پر بنارس کے متعدد قبرستانوں میں لوگوں نے سماجی فاصلہ کے ساتھ مرحومین کو یاد کیا، ای ٹی وی بھارت سے بات کرتے ہوئے استقبال قریشی نے بتایا کہ ملک میں آج عید الفطر کی نماز ادا کی جا رہی ہے اور یہ خوشی کا موقع ہے، لیکن ملک کورونا وائرس سے دوچار ہے جس میں بے شمار لوگوں کی جانیں گئیں ہیں ایسے میں ہم قبرستان میں آ کر کے ان تمام لوگوں کے لیے دعائے مغفرت کر رہے ہیں۔
انہوں نے کہا کہ ہم حکومت سے بھی مطالبہ کر رہے ہیں کہ خاطر خواہ انتظامات کریں تاکہ سبھی لوگوں کی جان کی حفاظت کو یقینی بنایا جا سکے اور ہم برادران وطن کے سبھی مذاہب کے ماننے والوں کے لیے دعا کرتے ہیں کہ ان کے گھر والوں کو اللہ رب العزت صبر جمیل عطا کرے۔
