پونچھ کے علاقہ تحصیل منڈی میں ریچھ کے حملے کا آج ایک تازہ واقعہ پیش آیا جس میں بیدار سے تعلق رکھنے والی ایک 40 سالہ خاتون نورجہان بیگم شدید طور پر زخمی ہوگئی، جسے مقامی لوگوں کی مدد سے سب ضلع اسپتال منڈی منتقل کیا گیا جہاں اسے ابتدائی علاج کے بعد ضلع اسپتال پونچھ ریفر کیا گیا۔
اس حوالے سے بلاک میڈیکل آفیسر منڈی نصرت النساء بھٹی نے بتایا کہ جنگلاتی علاقوں میں کٹائی کی وجہ سے جنگلی جانور آبادی کی جانب اپنا رخ کررہے ہیں، جس سے لوگوں کو نقصان ہورہا ہے۔ اس دوران مقامی لوگوں نے سخت برہمی کا اظہار کرتے ہوئے محکمہ وائلڈ لائف کی نااہلی کو ذمہ دار ٹھہرایا۔ عام لوگوں نے انتظامیہ سے اس مسئلہ کو جلدازجلد حل کرنے اور عوام کو تحفظ فراہم کرنے کا مطالبہ کیا۔
یہ بھی پڑھیں: پونچھ میں چار آئی ای ڈی کے ساتھ ایک گرفتار
واضح رہے کہ علاقہ میں گذشتہ ایک ہفتے کے دوران ریچھ کے حملے کے چار واقعات پیش آچکے ہیں، جس میں بائلہ گاؤں میں ایک شخص اور ایک خاتون شدید زخمی ہوگئی جن کا سورہ اسپتال سرینگر میں علاج کیا جارہا ہے جبکہ ایک اور سرحدی گاؤں ساوجیاں میں ریچھ نے حملہ کر ایک خاتون کو زخمی کردیا۔
