جموں و کشمیر پولیس کے ڈائریکٹر جنرل (ڈی جی پی) دلباغ سنگھ نے جمعرات کو دعویٰ کیا ہے کہ 'حیدر پورہ تصادم آرائی کے دوران اگر کوئی غلطی ہوئی ہے تو اس کو درست کرنے کے لئے پولیس تیار ہے'۔
ڈی جی پی کا بیان اس وقت آیا جب جموں و کشمیر کے لیفٹینٹ گورنر منوج سنہا نے تصادم کی تحقیقات کا حکم دیتے ہوئے کہا کہ 'سرکار تحقیقات کی رپورٹ آنے کے بعد کاروائی کرے گی'۔
ان کا مزید کہنا تھا کہ 'جموں وکشمیر انتظامیہ بے قصور عوام کی زندگیوں کی رکھوالی کے لیے کار بند ہے اور یقین دہانی کراتی ہے کہ کسی بھی قسم کی بے انصافی نہیں ہونے دیں گے'۔
وہیں ایک اہم پیشرفت کے تحت پولیس نے بتایا کہ 'لواحقین کو کل (جمعہ) شام تک لاشیں واپس دی جائیں گی، تینوں لاشوں کو نکالا جائے گا اور پھر قانونی لوازمات مکمل ہونے کے بعد لواحقین کو سونپ دی جائے گی اگر تمام لوازمات آج ہی مکمل ہوتی ہیں تو جلد ہی لاشیں واپس دی جائیں گی'۔
- مزید پڑھیں: ایل جی نے مجسٹریل انکوائری کا حکم دیا
واضح رہے کہ پیر کی شام پولیس نے سرینگر کے حیدر پورہ علاقے میں ہوئی تصادم آرائی کے دوران چار افراد کو ہلاک کرنے کا دعوی کیا تھا۔ پولیس کے مطابق ہلاک کیے گئے افراد میں ایک غیر ملکی عسکریت پسند حیدر، اس کا ساتھی عامر، عسکری معاون ڈاکٹر مدثر گلُ اور ایک بلڈنگ کا مالک محمد الطاف بٹ شامل ہیں۔ وہیں عامر، الطاف اور مدثر کے لواحقین نے پولیس کے دعووں کو بےبنیاد قرار دیتے ہوئے انصاف کا مطالبہ کیا ہے اور لاشوں کی مانگ کی ہے'۔
