حریت کانفرنس کے چیئرمین مولوی محمد عمر فاروق نے بزرگ اور کشمیر کے سب سے بڑے حریت رہنما سید علی گیلانی کے انتقال پر سخت رنج و غم کا اظہار کیا ہے۔
مولوی محمد فاروق نے حریت کانفرنس (ع)کی جانب سے گیلانی کے فرزند نسیم گیلانی اور نعیم گیلانی کو تعزیت کا اظہار کیا ہے۔
اپنے بیان میں حریت چیئرمین نے سید علی گیلانی کو خراج تحسین پیش کرتے ہوئے کہا کہ جموں وکشمیر کی سیاست اور قوم کے تئیں ان کی خدمات کو فراموش نہیں کیا جاسکتا ہے۔
مولوی محمد فاروق نے کہا کہ سید علی شاہ گیلانی کی وفات سے جموں وکشمیر کی سیاست میں ایک خلا پیدا ہوگیا ہے۔ جس کو پُر کرنا کافی مشکل ہے۔
مولوی محمد عمر فاروق نے اس بات پر بھی دکھ جتایا کہ وہ طویل نظربندی کی وجہ سے سید علی گیلانی کے نماز جنازہ میں شرکت نہیں کرسکے۔
مزید پڑھیں:سید علی گیلانی کی رحلت: کیا کشمیر میں ’حریت‘ یتیم ہوگئی؟
وہیں انہوں نے اس بات پر بھی افسوس کا اظہار کیا ہے کہ انتظامیہ کی جانب سے سخت پابندیاں عائد کرکے عوام کو بھی ان کے نماز جنازہ میں شرکت کرنے کی اجازت نہیں دی گئی جو کہ قابل مذمت ہے۔
یہ بھی پڑھیں:گیلانی کی وفات پر کشمیر میں عائد کی گئیں سخت بندشیں
ہم آپ کو بتادیں کہ جموں و کشمیر کے علاحدگی پسند رہنما سید علی شاہ گیلانی کل دیر رات اپنے گھر حیدرپورہ میں وفات پاگئے۔ ان کی وفات کی خبر کے بعد وادیٔ کشمیر میں سکیورٹی کے سخت انتظامات کردیے گئے ہیں۔ موبائل خدمات اور انٹرنیٹ سروسز کے ساتھ ساتھ ریل سروسز بھی بند کردی گئی ہیں۔
