لاک ڈاؤن کے درمیان محنت کشوں کا عالمی دن

عالمی وبا کووڈ۔19 مزدوروں کی زندگیوں میں بہت بڑا بحران بن کر آیا ہے اور آج یوم مزدور کے موقع پر ہزاروں محنت کشوں کو نوکریوں سے نکالا جا رہا ہے۔

یوم مزدور ہر سال یکم مئی کو منایا جاتا ہے۔ اس دن مزدورں، کاریگروں، کم اجرت اور نچلے طبقے کے لوگوں کی مجموعی، قومی،ملکی ،سماجی اور معاشی خدمات کا اعتراف اور کردار کا تذکرہ کیا جاتا ہے۔
وہیں اس بات کا بھی اعادہ کیا جاتا ہے کہ انہیں معاشرے میں صحیح عزت واحترام دلایا جائے۔
لیبر ڈے یا یوم مئی پر دنیا بھر میں تقریبات، ریلیوں، جلوسوں، سمیناروں اور مباحثوں کا اہتمام کیا جاتا ہے لیکن کوروناوائرس کے نتیجے میں جاری لاک ڈاؤن کے بیچ محنت کشوں کا عالمی دن منایا جارہاہے۔ لاک ڈاؤن اور سماجی دوری کے اطلاق کے دوران آج نہ تو کوئی ریلی ہی نکالی گئی اور نہ ہی کسی تقریب کا اہتمام کیا گیا۔

یوں تو مزدور اور محنت کش طبقہ ہمیشہ مسائل و مشکلات میں گرا رہتا ہے اور آج کے دن ہر سال ان لوگوں کو درپیش مشکلات کو کم کرنے کے حوالے سے عہدوپیمان کیا جاتا ہے۔ لیکن وہ الگ بات ہے کہ بعد میں نہ ہی سرکاری اور نہ ہی نجی سطح پر ان کے حقوق کی پاسداری پر عمل درآمد کرنے کی کوئی زحمت کرتا ہے۔لاک ڈاؤن کی وجہ سے کامگار یا مزدور طبقہ روٹی کے لیے ترس رہا یے۔ ملک بھر کے ساتھ ساتھ جموں و کشمیر میں بھی ترقیاتی کام مکمل طور ٹھپ ہوکر رہ گئیں ہیں اور ایسے میں مزدور بھی اپنے گھروں میں ہی ہاتھ پر ہاتھ دھرے بھیٹے بے کاری اور بے روزگاری کی زندگی گزار رہے ہیں۔ ایسے میں یہ طبقہ اپنے اہل عیال کے لیے دو وقت کی روڑی جٹانے سے بھی قاصر ہیں۔کسی بھی معاشرے میں مزدوروں کے کردار کو فراموش نہیں کیا جاسکتا ہے۔ وہیں ملک یا قوم کی ترقی اور خوشحالی کے لیے کام گر طبقہ ریڑھ کی ہڈی کی حثیت رکھتا ہے۔ ان کے دم پر تمام ترقیاتی پروجیکٹ مکمل ہو پاتے ہیں۔ بڑی بڑی صنعتیں، کارخانے اورفکٹریاں انہیں سے چلتی ہیں۔ اس لیے مزدور کسی بھی تنظیم، ادارے اور کس بھی قوم کا اعظیم اثاثہ ہوتے ہیں۔ایسے میں ضرورت اس بات کی ہے ملک بھر کے ساتھ ساتھ جموں و کشمیر حکومت بھی اس طبقے کی فلاح و بہبود کے حوالے سے سنجیدہ اقدامات اٹھائےاور ان کی راحت رسانی کے لیے ایک ایسی پالیسی مرتب کرے جس کے ہوتے ہوئے لاک ڈاؤن اور دیگر ناگہانی آفات کے دوران اس طبقے کو در در کی ٹھوکریں کھانے پر مجبور نہ ہونا پڑے۔