سرینگر: سی آر پی ایف کے ایک ترجمان نے بتایا کہ جمعہ کے روز آئی جی سی آر پی ایف ایم ایس بھاٹیا نے امرناتھ گُھپا کا دورہ کیا۔ انہوں نے بتایا کہ آئی جی سی آر پی ایف نے پنجترنی بیس کیمپ میں سی آر پی ایف کی جانب سے یاتریوں کو دی جارہی سہولیات کے بارے میں جانکاری حاصل کی۔ آئی جی کو بتایا گیا کہ بادل پھٹنے کے بعد سی آر پی ایف نے فوری طورپر ریسکو آپریشن شروع کیا جس وجہ سے کئی یاتریوں کی جانیں بچائی گئیں۔
ذرائع کا کہنا ہے کہ آئی جی سی آر پی ایف نے جوانوں سے مخاطب ہوتے ہوئے کہا کہ سالانہ امر ناتھ یاترا کو خوش اسلوبی کے ساتھ پایہ تکمیل تک پہنچانے کی خاطر کوئی دقیقہ فروگزاشت نہیں کیا جانا چاہئے۔ اُنہوں نے پنجترنی کے مقام پر تعینات آفیسران پر زور دیا کہ یاتریوں کو ہر طرح کی مدد فراہم کرنے کے ساتھ ساتھ اُنہیں سبھی سہولیات میسر رکھی جائے۔
وہیں جموں و کشمیر پولیس کے ڈی جی پی دلباغ سنگھ نے بھی آج امرناتھ گُپھا کا دورہ کیا ۔ انہوں نے پنجترنی کیمپوں کا دورہ بھی کیا۔ دورے کے دوران ڈی جی پی نے حفاظتی انتظامات کا جائزہ لیا۔ دلباغ سنگھ نے بادل پھٹنے کے بعد تمام لوگوں کی کوششوں کو سراہا انہوں نے سول انتظامیہ اور سکیورٹی فورسز کے افسران کے ساتھ بات چیت بھی کی۔
مزید پڑھیں:
واضح رہے کہ سطح سمندر سے 13000 فٹ کی بلندی پر واقع ایک پہاڑی غار میں گرما کے دوران بننے والی ایک برفانی شبیہ کو شیولنگ کے ساتھ منسوب کیا جاتا ہے جس کی ہندو عقیدت مند پوجا کرتے ہیں۔ امرناتھ یاتریوں کے لیے اس سال آن لائن ہیلی کاپٹر بکنگ سروس بھی شروع کی گئی ہے۔ 43 دنوں تک جاری رہنے والی یاتری 11 اگست کو رکھشا بندھن کے تہوار کے موقع پر اختتام پذیر ہوگی۔
