ہریانہ پولیس نے این ڈی پی ایس معاملے میں بڈگام کے دو افراد کو کیا گرفتار

ہریانہ پولیس نے وسطی کشمیر کے ضلع بڈگام میں دو افراد کو گرفتار کرلیا ہے۔ گرفتار شدہ افراد میں ایک پٹھواری بھی شامل ہے۔

ہریانہ پولیس نے بڈگام پولیس کی مدد سے دربل بمنہ کے عاشق حسین جو کہ پیشے سے ایک پٹھواری ہیں کو گرفتار کیا ہے۔ وہیں دوسرے شخص کو وہاب پورہ میں گرفتار کیا گیا یے، جس کی شناخت ارشاد علی گنائی کے طور پر بتائی جارہی ہے۔

خبر کے مطابق ان افراد کو این ڈی پی ایس معاملے میں گرفتار کیا گیا ہے۔ پولیس کے مطابق ان دونوں افراد کے خلاف سنہ 2019 میں ایف آئی آر درج کی گئی تھی۔

پولیس نے بتایا کہ عاشق کے خلاف سیکشن 21،29 این ڈی پی ایس کے تحت ایف آئی آر 633 درج ہے جب کہ ارشاد کے خلاف سیکشن 21 اور 25 این ڈی پی ایس کے تحت ایف آئی آر نمبر 433 درج کی گئی ہے۔

پانیپت پولیس کی ٹیم نے آج ضلع بڈگام آکر بڈگام پولیس کی مدد سے ان دونوں افراد کو گرفتار کرلیا۔ بڈگام پولیس کے مطابق ان دونوں افراد کو پانیپت پولیس کے حوالے کردیا گیا۔