ڈاکٹر فاروق عبداللہ نے زیڈ موڈ سرنگ پر کام کاج کا جائزہ لیا

جموں وکشمیر نیشنل کانفرنس کے صدرو رکن پارلیمان سرینگر ڈاکٹر فاروق عبداللہ نے پیر کے روز گاندربل کا دورہ کیا اور اس ضلع میں زیر تعمیر زیڈ موڈ ٹنل پروجیکٹس پر ہورہے کام کاج کا جائزہ لیا۔

اس موقع پر ان کے ہمراہ صوبائی صدر ناصر اسلم وانی، سینیئر رہنما اور ضلع گاندربل کے سابق ممبر اسمبلی میاں الطاف احمد اور نائب صدر کے سیاسی مشیر تنویر صادق بھی تھے۔

فاروق عبداللہ نے سرنگ میں ہورہے کام کا جائزہ لینے کے دوران از خود اس کا معائنہ کیا اور سرنگ کے ذمہ داران سے بات چیت کرکے ان کا شکریہ ادا کیا کہ جس حساب سے انہوں نے سرنگ پر کام کیا ہے۔ فاروق عبداللہ نے کہا ہے کہ جس طرح ایجنسی نے اس سرنگ پر کام کیا ہے اس سے پتہ چلا کہ ٹنل کافی حد تک تیار ہوچکی ہے اس سے صاف ظاہر ہوتا ہے کہ ملازمین اس پر دل و جان سے کام کررہے ہیں۔ ٹنل کے ذمہ داران نے ممبر پارلیمنٹ کو یقین دلایا کہ اگلے سال کے اواخر تک اس پر کام مکمل ہونے کا اندیشہ ہے۔

فاروق عبداللہ نے مزید کہا کہ ایسی سرنگیں اور شاہراہیں کسی بھی قوم کی ترقی کے لیے اہم ہوتی ہیں۔ یہ ایک سنگ میل ہے جو ان علاقوں میں رہنے والے لوگوں کو تیز رفتار رابطے اور خوش حالی کی طرف لے جائے گی۔ اس موقع پر ڈاکٹر فاروق نے ڈیسن کاپرن، سیمتھان، رزدان اور سدھنا پاس پر سرنگوں کی تیز رفتار تعمیر کا مطالبہ کیا ہے۔