کورونا وائرس کے خدشے کو دیکھتے ہوئےایک جانب ملک میں سرکاری سطح پر اس سے تحفظ کیلئے مختلف تدابیر اختیار کی جا رہی ہیں وہیں ملی تنظیموں کے سربراہان کی جانب سے بھی اہل میوات کے لئے رہنمائے پیغامات جاری کئے گئے ہیں۔
آج جہاں شرعی مجلس میوات نے لوگوں سے تحریری طور پر عوام سے سرکاری ہدایات پر عمل پیرا ہونے کی اپیل کی ہے وہیں امارت شرعیہ یونٹ میوات نے بھی میوات کے لوگوں سے اپنے لیٹر پیڈ پر اپیل جاری کرتے ہوئے ایک ذمہ دار شہری بننے کے تلقین کی ہے۔
ساتھ ہی دونوں تنظیموں نے میوات کے آئمہ کرام سے گزارش کی ہے کہ مساجد میں نماز با جماعت محدود سطح پر پڑھی جائے۔ سرکاری و محکمہ صحت کی جانب سے جاری ہدایات پر عمل کیا جائے۔
اس سلسلے میں جمعیتہ علماء ہریانہ پنجاب ہماچل چنڈی گڑھ کے سابق صدر مولانا محمد خالد قاسمی نے کہا کہ لوگ کل جمعہ کو اپنے گاؤں میں ہی ظہر کی نماز پڑھنے پر اکتفاء کریں اور اپنے گھروں میں ہی رہیں۔ موجودہ حالات میں یہی اسلامی شریعت کا تقاضا ہے۔
میوات کے قدیم ترین دینی درسگاہ کے ذمہ دار مفتی زاہد حسین نے اپیل کی ہے کہ جن گاؤں میں جمعہ کی نماز ادا نہیں کی جاتی وہ لوگ نہ شہروں کا رخ کریں اور نہ ہی پڑوس کے گاؤں کا بلکہ اپنے محلے میں ہی مختصر خطبہ کے ساتھ مختصر جمعہ ادا کریں۔
