ضلع انتظامیہ کی جانب سے شاہراہ کو بحال کرنے کے لئے جنگی بنیادوں پر مٹی کے تودے اور پتھر ہٹانے کا کام جاری رہا اور کئی گھنٹوں تک شاہراہ پر ٹریفک کی نقل و حمل متاثر رہی۔
بعد دوپہر شاہراہ کو بحال کیا گیا تاہم اس دوران سینکڑوں گاڑیاں درماندہ تھیں۔ جن میں مسافر و مال بردار گاڑیوں کے ساتھ ساتھ امرناتھ یاتریوں سے بھری متعدد گاڑیاں بھی شامل ہیں۔
قابل ذکر ہے کہ خراب موسم کے چلتے آج صبح سرینگر جموں قومی شاہراہ پر ضلع رام بن کے ڈیگڈول، موم پسی اور گانگرو کے مقام پر چٹانیں کھسکنے اور مٹی کے تودے گر آنے کے سبب شاہراہ کو ٹریفک کی نقل و حمل کے لئے روک دیا گیا تھا۔
اس دوران امرناتھ یاتریوں سے بھری ایک گاڑی جموں سے بالہ تل کی طرف جا رہی تھی کہ ڈیگڈول کے مقام پر اچانک پہاڑی سے پتھر کھسک کر گاڑی سے جا ٹکرایا۔ جس کے نتیجے میں ایک یاتری زخمی ہو گیا۔
زخمی یاتری کو ضلع ہسپتال منتقل کیا گیا جہاں ڈاکٹروں نے انہیں جموں کے میڈیکل کالج و ہسپتال ریفر کر دیا۔
سرینگر - جموں قومی شاہراہ اکثر و بیشتر، بھاری برفباری، بارش، سڑک کھسکنے اور مٹی کے تودے گر آنے کی وجہ سے آئے روز آمد و رفت کے لئے بند ہو جاتی ہے۔
