'بہار میں کورونا مریضوں کی ریکوری شرح سب سے زائد'

بہار اسمبلی اسپیکر وجئے کمار چودھری نے کہا ہے کہ کورونا وبا کے خلاف ریاستی حکومت کی منظم لڑائی کی وجہ سے آج ریاست میں کووڈ 19 کے مریضوں کی صحت یابی کی شرح ملک میں سب سے زیادہ ہے۔

مسٹر چودھری نے ہفتے کے روز یہاں دلسنگھ سرائے میں انوویٹرز ان ہیلتھ (انڈیا) اور ڈسٹرکٹ ہیلتھ سوسائٹی کے تعاون سے قائم 50 بستروں پر مشتمل کووڈ کیئر سنٹر کا افتتاح کرتے ہوئے حکومت کی جانب سے ہر ممکن امداد فراہم کرنے کی یقین دہانی کرائی۔ انہوں نے کہا کہ سینٹر کو ہر طرح سے امداد فراہم کی جائے گی تاکہ یہاں کے مریضوں کی دیکھ بھال آسانی سے ہوسکے۔ انہوں نے علاقے میں خدمات انجام دینے کے لئے رضاکارانہ تنظیم انوویٹرز ان ہیلتھ (انڈیا) کے ٹرسٹی ڈاکٹر منیش کمار کی تعریف کرتے ہوئے کہا کہ اس تنظیم نے طبی شعبے میں بہت قابل تعریف کام کیا ہے۔

اسپیکر نے کہا کہ حکومت نے کورونا کےدور میں کووڈ کیئر سنٹر کھولنے اور کووڈ اسپتالوں کا قیام جس طرح منصوبہ بند طریقے سے کیا گیا ، اس کا اثر دکھائی دے رہا ہے ۔ حکومت کی اچھی کارکردگی کا نتیجہ ہے کہ آج ریاست میں کورونا مریضوں کی صحت یابی کی شرح ملک میں سب سے زیادہ ہے۔