مغربی چمپارن: موٹر سائیکل چور گروہ کے سات اراکین گرفتار

بہار میں مغربی چمپارن ضلع کے بگہا نگر تھانہ علاقہ سے پولیس نے موٹر سائیکل چور گروہ کے سات اراکین کو جمعرات کو گرفتار کر کے جیل بھیج دیا۔

بگہا کے پولیس سپرنٹنڈنٹ کرن کمار جادھو نے یہاں پریس کانفرنس میں بتایاکہ بگہا شہر کے مارواڑی ٹولہ محلہ سے 31 اگست کو ہوئی ایک موٹر سائیکل چوری کے معاملے میںپولیس نے فوری کاروائی کرتے ہوئے سورج شرما عرف آنند شرما اور انتیش ساہ کو شہر کے مل پورا کے پاس چوری کی مذکورہ موٹر سائیکل کے ساتھ بدھ کو گرفتار کرلیا۔ گرفتار کیے گئے ان دونوں چوروں کے پاس سے موٹر سائیکل چوری کرنے میں استعمال میں لائے جانے والے تین موٹر سائیکل بھی برآمد کئے گئے ۔ انہوں نے بتایاکہ گرفتار دونوں موٹر سائیکل چوروں نے تفتیش میں بتایا کہ ان لوگوں نے دیگر ساتھیوں کے ساتھ مل کر سرحدی اتر پردیش کے کشی نگر ضلع کے کپتان گنج سے پانچ موٹر سائیکل اور بگہا شہر سے دو موٹرسائیکلوں کی چوری کی ہے ۔
مسٹر جادھو نے بتایاکہ گرفتار چوروں کی نشاندہی پر پولیس نے بگہا شہر کے مختلف محلوں سے راہل کمار ، ویشال کمار ، سنجیو کمار عرف بھوٹیا ، محمد اشفاق سمیت بیگو سرائے کے ایموسنت نگر باشندہ سجیت کمار کو گرفتار کرلیا ہے ۔ گرفتار ان چوروں کے پاس سے چوری کی موٹرسائیکل ضبط کی گئی ہے ۔ گروہ میں شامل افراد چوری کی موٹر سائیکل کی خرید وفروخت اور اس کا انجن اور پینٹ بدلنے کاکام کرتے تھے ۔ انہوں نے بتایا کہ گرفتار موٹر سائیکل چور گروہ کے سبھی اراکین کو تفتیش کے بعد جمعرات کو عدالتی حراست میں بگہا جیل بھیج دیا گیا ہے۔