RJD on Nitish Kumar's Samaj Sudhar Yatra: نتیش کمار کی سماج سدھار یاترا پر آر جے ڈی کی تنقید

راشٹریہ جنتا دل کے ریاستی ترجمان اعجازاحمد نے وزیراعلیٰ نتیش کمار کی سماج سدھار یاترا Sudhar yatra پرشدید تنقید کرتے ہوئے کہا کہ نتیش کمار کس طرح کی سماج سدھار یاترا پر نکلے ہیں۔ جو اپنے افسران اور لیڈران کو نہیں سدھار سکے، جس پارٹی کے وزراء اور لیڈران بدعنوانی میں ملوث ہوں، جن کے افسران بدعنوانی میں اول مقام رکھتے ہوں، جہاں آئے دن افسران کے گھروں سے رشوت کے کروڑوں روپے نکلتے ہوں، وہ پہلے اپنے افسران کوسدھاریں، پھرعوام کوسدھارنے کا کام کریں۔

راشٹریہ جنتا دل کے ریاستی ترجمان اعجازاحمد نے بہار کے وزیر اعلیٰ نتیش کمار کی سماج سدھار یاترا کو شدید تنقید کا نشانہ بنایا۔ انہوں نے کہا شراب بندی کے معاملے میں خود ان کی اتحادی پارٹی کو اختلاف ہے۔

این ڈی اے اتحاد کے جیتن رام مانجھی Jaiten Ram Manjhi شراب بندی قانون میں سب سے بڑی رکاوٹ افسران اور لیڈران کو بتا رہے ہیں، جبکہ جے ڈی یو رکن اسمبلی بھاگلپور کے بی جے پی رکن پارلیمان پر ہی شراب فروخت کا الزام عائد کر رہے ہیں، مگر حکومت کی جانب سے اس پر کوئی کارروائی نہیں کی جاتی۔

'خواتین کے نام پر وزیر اعلیٰ شراب بندی مہم کا کریڈٹ لے رہے ہیں۔ آج شراب بندی کے نام پر سب سے زیادہ انہیں خواتین کو پولس کے ذریعہ ہراساں کیا جاتا ہے۔ اس لئے وزیر اعلیٰ کا سماج سدھار یاترا بے محل سا لگتا ہے۔

اعجاز احمد نے کہا کہ بہار میں چھوٹے چھوٹے بچے منشیات کے عادی ہو چکے ہیں۔ پٹنہ کے سڑکوں پر بچے نشہ کرتے ہوئے دکھائی دیتے ہیں۔ مگر ضلع انتظامیہ کی جانب سے کوئی کارروائی نہیں ہوتی۔

'اس سے صاف ظاہر ہوتا ہے کہ نتیش کمار سماج سدھار یاترا کے ذریعہ صرف اپنا چہرہ چمکانا چاہتے ہیں۔ یہ فضول خرچی کے علاوہ کچھ بھی نہیں ہے۔ بنیادی مسائل کی طرف سے لوگوں کا ذہن بھٹکانے کے لئے یہ سب حربہ استعمال کیا جا رہا ہے۔'