بہار اسمبلی انتخاب میں پانچ سیٹوں پر کامیابی کا پرچم لہرانے کے بعد آل انڈیا مجلس اتحاد المسلمین کے نومنتخب ارکان اسمبلی کا حیدرآباد سے کشن گنج پہنچنے پر آج کشن گنج پارٹی دفتر میں والہانہ استقبال کیا گیا۔
مجلس اتحاد المسلمین کشن گنج پارٹی دفتر میں بہار ریاستی صدر اور امور اسمبلی حلقہ کے نو منتخب رکن اسمبلی اخترالایمان نے کہا کہ وطن عزیز کو انگریزوں سے زیادہ فرقہ پرست طاقتوں سے نقصان پہنچا ہے اور ان فرقہ پرست طاقتوں کے خلاف جنگ لڑنا ہماری پارٹی کے اولین ترجیحات میں سے ایک ہے۔
انہوں نے عظیم اتحاد کی حمایت کرنے کے سوال پر کہا کہ پہلے بہار میں عظیم اتحاد حمایت لینے کے لائق ہو جائے، اس کے بعد ہی ہماری پارٹی اس متعلق غور و فکر کرے گی۔
پارٹی کے ریاستی صدر اخترالایمان نے کشن گنج اسمبلی سیٹ سے ایم آئی ایم کے رہنما قمرالہدیٰ کی شکست پر افسوس کا اظہار کیا اور ایم آئی ایم کے سابق رکن اسمبلی قمر الہدیٰ کے ساتھ مل کر کشن گنج اسمبلی حلقہ میں کام کرنے کی بات کہی ہے۔
مزید پڑھیں: حیدرآباد: نئے ارکان اسمبلی کی اسدالدین اویسی سے ملاقات
اس موقع پر ریاستی صدر اخترالایمان کے علاوہ کوچادھامن اسمبلی حلقہ سے نومنتخب رکن اسمبلی اظہار اصفی، ارریہ ضلع کے جوکی ہاٹ سے نومنتخب رکن اسمبلی شہنواز عالم، بائسی سے نومنتخب رکن اسمبلی سید رکن الدین ، پارٹی کے ریاستی جنرل سیکرٹری انجینئیر آفتاب عالم وغیرہ موجود تھے۔
