کسان کی پریشانیوں کے حل نہ ہونے کی وجہ سے وہ خودکشی کرنے پر مجبور ہیں۔ کسانوں کے مسائل کی نہ تو مرکز حکومت کو فکر ہے اور نہ ریاستی حکومت کو۔
کسانوں کو صرف ایک ووٹ بینک کا ذریعہ بنا لیا گیا ہے۔ مذکورہ باتیں کانگریس کسان سیل ارریہ کے ضلع صدر مولانا آفاق انور صدیقی نے گاندھی آشرم واقع ضلع کانگریس کے دفتر میں صحافیوں سے کہی۔
کانگریس کے ضلع صدر انیل کمار سنہا نے کہا کہ ضلع ارریہ کی شناخت زراعت کے طور پر ہے، یہاں دھان، مکا، بازرا کی پیداوار زیادہ ہے، باوجود اس کے یہاں کے کسانوں کو ہر برس مختلف پریشانیوں سے گزرتا پڑتا ہے۔
انہوں نے مذید کہا یہاں کاشت کار سیلاب اور سکھاڑ کی مار جھیلنے کو مجبور ہے۔
کانگریس رہنما شنکر پرساد نے کہا کہ گزشتہ پانچ برسوں میں مودی حکومت کسانوں سے کئے گئے ایک بھی وعدے پورے نہیں کر پائی، مگر ہم امید کرتے ہیں مودی حکومت کسانوں کے بڑھتے مسائل پر سنجیدگی سے غور کرے گی تاکہ کوئی کسان خودکشی کرنے پر مجبور نہ ہو۔
پریس کانفرنس میں مظفرپور میں چمکی بخار سے بچوں کی اموات پر تمام کارکنان نے اظہار افسوس کرتے ہوئے اہل خانہ کے صبر جمیل کی دعا کی، ساتھ ہی ریاستی حکومت پر شدید تنقید کرتے ہوئے بچوں کی موت پر ذمہ داری لیتے ہوئے وزیر صحت سے استعفیٰ کا مطالبہ بھی کیا۔ اس موقع پر خواتین سیل کی ضلع صدر سوشیلا شاہ، محمد غالب، محمد علیم الدین، عبدالمنان انصاری، محمد اشرف، منو مانو وغیرہ بھی موجود تھے۔
