ریاست بہار کےضلع ارریہ میں کے ترقیاتی منصوبوں پر غور و خوض کرنے اور جائزہ لینے کے لیے رکن پارلیمان پردیپ کمار سنگھ کی صدارت میں ایک اہم نشست ضلع کلکٹریٹ احاطہ کے سبھا بھون میں منعقد ہوئی۔
نشست میں تمام محکموں کے افسران سمیت چھ اسمبلی حلقہ کے رکن، ضلع پریشد چیئرمین، نگر پریشد چیئرمین و ضلع کلکٹر شامل ہوئے اور گزشتہ پانچ سالہ منصوبہ کے تحت ہوئے کاموں کا جائزہ لیا۔
نشست میں تمام محکموں کے افسران نے رپورٹ پیش کی جسے تمام نمائندگان نے بغور سنا۔
وہیں نشست میں ضلع پریشد کے چیئرمین آفتاب عظیم عرف پپو عظیم نے اقلیتی فلاح محکمہ کے سامنے ضلع میں متعدد زیر التوا ہاسٹل کا معاملہ اٹھایا، جس پر کافی بحث بھی ہوئی۔
اس کے علاوہ ضلع میں منشیات کو روکنے میں ناکام ضلع انتظامیہ پر بھی سوال اٹھائے، آفتاب عظیم عرف پپو عظیم نے کہا کہ حکومت کی جانب سے اقلیتی طبقہ کے لئے کئی طرح کے منصوبے زمین پر اتارے گئے ہیں مگر لوگ اس سے ناواقف ہیں، آخر ارریہ ضلع اقلیتی محکمہ اس سمت کیا کررہی ہے۔
لوگوں میں ان منصوبوں کے تئیں بیدار کرنے کے لیے کیا کررہی ہے جس پر افسران نے کورونا کا حوالہ دیتے ہوئے کام نہ ہونے کی وجہ بتائی۔
ای ٹی وی بھارت سے بات کرتے ہوئے آفتاب عظیم عرف پپو عظیم نے کہا کہ شہر کے آزاد اکادمی احاطہ میں واقع اقلیتی ہاسٹل، تسلیم الدین روڈ واقع اقلیتی ہاسٹل و دیگر جگہوں پر موجود اقلیتی ہاسٹل اب تک محکمہ کی جانب سے نہیں سونپا گیا ہے جس سے طلباء میں کافی مایوسی ہے۔
اسی طرح شہر میں آئے دن کف سیرپ و دیگر نشہ آور سامان برآمد ہو رہے ہیں، ضلع انتظامیہ اب تک اس پر روک لگانے میں ناکام ثابت ہوئی ہے۔
ضلع پولیس کو اس جانب خاص توجہ دینے کی ضرورت ہے تاکہ مکمل اس کی روک تھام ہوسکے۔
