بہار حکومت سے اجازت ملنے کے بعد پٹنہ سمیت ریاست کے دیگر اضلاع میں پیر سے سرکاری اور پرائیوٹ اسکولوں میں درس و تدریس کا کام شروع ہو گیا ہے ۔ حکومت نے ابھی نویں سے لیکر بارہویں تک کے کلاسوں کو شروع کرنے کی اجازت دی ہے ۔ ان کلاسوں میں 50 فیصد بچوں کو ہی بلانے کی اجازت دی گئی ہے ۔ حالانکہ اس کے باوجود بچوں کی حاضری کئی اسکولوں میں کافی کم دیکھی گئی ۔
حکومت سے اسکول کھولنے کی اجازت ملنے کے باوجود بیلی روڈ واقع سینٹرل اسکول سمیت کئی اسکول ابھی نہیں کھلے ہیں۔ ان اسکولوں کی انتظامیہ ابھی اس بار ے میں طلباء کے گارجینوں سے رائے لینے کے بعد فیصلہ لیں گے کہ درس وتدیس کا کام کب سے شروع کرنا ہے۔ جن اسکولوں میں آج سے درس و تدریس کا کام شروع ہوا ہے، وہاں کورونا وبا سے تحفظ کیلئے مکمل احتیاط برتے جارہے ہیں۔
اسکولوں میں داخلہ کے وقت تھرمل اسکریننگ سے بچوں کے جسم کے درجہ حرارت کی جانچ کی جارہی ہے ۔ اس کے ساتھ ہی جسمانی دوری کا بھی خیال رکھاجارہاہے ۔ سبھی اسکولوں میں سنیٹائزر کانظم مین گیٹ سمیت دیگر مقامات پر کیا گیا ہے۔ سبھی اسکولوں میں بچوں کو ماسک پہن کر آنا لازمی کیا گیا ہے ۔ کچھ اسکولوں میں بچوں کو گلوس پہن کر آنے کو کہا گیا ہے ۔
یو این آئی
