پٹنہ : بہار میں کورونا انفیکشن کے خدشات کے درمیان دوسرے مرحلے کے اسمبلی انتخابات میں ووٹروں کا حوصلہ کم نہیں ہوا اور 54.64 فیصد رائے دہندگان نے جمہوریت کے اس تہوار میں اپنی حصہ داری کو یقینی بنا کر بی جے پی کے نند کشور یادو، جے ڈی یو کے شرون کمار اور آرجے ڈی کے تیجسوی پرساد یادو سمیت 1463 امیدواروں کی قسمت کا فیصلہ الیکٹرانک ووٹنگ مشین ( ای وی ایم ) میں بند کر دیا۔
چیف الیکشن افسر ایچ آر شری نیواس نے پریس کانفرنس میں بتایا کہ ریاستی الیکشن دفتر کے مطابق دوسرے مرحلہ میں 17 اضلاع کے 94 اسمبلی حلقوں میں 41326 ووٹنگ مراکز پر منگل کی صبح سات بجے شروع ہوئی ووٹنگ شام چھ بجے ختم ہوگئی۔ اس دوران 54.64 فیصد رائے دہندگان نے اپنے حق رائے دیہی کا استعمال کیا۔ ووٹنگ ختم ہونے پرمظفرپور ضلع میں سب سے زیادہ 59.98 فیصد ووٹنگ ہوئی وہیں پٹنہ ضلع میں سب سے کم 48.23 فیصد ووٹ پڑے۔
مزید پڑھیں: کٹیہار میں فوڈ پروسیسنگ یونٹ اور صنعتیں قائم کی جائیں گی: راہل
مسٹر شری نیواس نے بتایاکہ مغربی چمپارن ضلع میں 55.99 فیصد، مشرقی چمپارن میں 56.75 فیصد، شیوہر میں 56.04 ، سیتامڑھی میں 57.40، مدھوبنی میں 52.67 ، دربھنگہ میں 54.15 ، مظفر پور میں 59.98 ، گوپال گنج میں 55.09، سیوان میں 51.88، سارن میں 54.15 ، ویشالی میں 51.93 ، سمستی پور میں 56.02 ، بیگو سرائے میں 58.67 ، کھگڑیا میں 56.10، بھاگلپور میں 54.54 ، نالندہ میں 51.06 اور پٹنہ میں ضلع میں 48.23 فیصد ووٹروں نے اپنے حق رائے دہی کا استعمال کیا ہے۔
