بہار اسمبلی میں آج نائب وزیر اعلیٰ تارکشور پرساد نے بجٹ پیش کرتے ہوئے کئی اعلانات کیے۔ انہوں نے کہا کہ اس بار کا بجٹ 2 لاکھ 18 ہزار 303 کروڑ ہے۔ جو گذشتہ برس کے مقابلے میں کئی ہزار کروڑ روپے زیادہ ہے۔ نائب وزیر اعلی کہا کہ' صاف ستھرے شہر اور بے سہارا لوگوں کے لیے ایک کثیر منزلہ عمارت تعمیر کی جائے گی۔ شہری بے گھر افراد کو مکانات فراہمی کی جائے گی۔ گھاٹوں پر سہولیات بحال ہوں گی۔ اس کے علاوہ ہر کھیت تک پانی پہنچانے کے لیے مختلف محکموں میں 500 کروڑ روپے کی اضافی رقم مختص کیا گیا۔ تمام دیہات میں سولر اسٹریٹ لائٹ کی تنصیب کا کام جاری ہے۔ سولر اسٹریٹ لائٹس کے لیے ڈیڑھ سو کروڑ کا الگ سے انتظام کیا گیا ہے۔
نائب وزیر اعلی اور وزیر خزانہ نے کہا کہ ریاست میں تین نئے میڈیکل کالج کے قیام کے لیے عملی کارروائی جاری ہے۔ اب تک 14 پولی ٹیکنک کالج کھولے جا چکے ہیں۔ مزید دیگر کے لیے کارروائی جاری ہے جو رواں برس تک مکمل ہوجائے گی۔ انہوں نے کہا کہ ریاست میں اسپورٹس یونیورسٹی کا قیام عمل میں لایا جائے گا۔ خواتین کے کاروبار کے لیے ایک خصوصی اسکیم متعارف کروائی جائے گی۔ سرکاری دفاتر خصوصاً علاقائی انتظامیہ، پولیس اسٹیشن میں خواتین کی شرکت میں اضافہ کیا جائے گا۔ ابھی خواتین کے لیے 35 فیصد ریزرویشن ہے لیکن ان کی شرکت میں مزید اضافہ کیا جائے گا۔
وزیر خزانہ تار کشور پرساد نے بجٹ تقریر کا آغاز سابق وزیر اعظم اٹل بہاری واجپئی کی نظم سے کیا۔ انہوں نے کہا کہ حکومت کی کاوشوں سے ہم معاشی بحران سے نکل پائے ہیں۔ کورونا کا خطرہ ابھی ٹلا نہیں ہے۔ ہم آفات سے گھبراتے نہیں ہیں۔ انہوں نے کہا کہ بہار کے ہر ضلع میں میگا اسکل سنٹر قائم ہوگا، سرکاری دفاتر میں خواتین کی شرکت میں اضافہ ہوگا۔
