ارریہ ضلع کے واحد صدر ہسپتال میں یومیہ ہزاروں سے زائد مریض علاج و معالجہ کے لئے دور دراز سے آتے ہیں مگر آئے دن ہسپتال میں ڈاکٹر کی کمی اور بہتر انتظام نہ ہونے سے مریضوں کی مود ہو جاتی ہے۔
تازہ معاملہ شہر کے وارڈ نمبر 26 اسلام پور واقع سابق وارڈ کاؤنسلر مہتاب عالم کے گھر کا ہے، جہاں ان کے بڑے بھائی سرفراز عالم کی محض 39 برس کی عمر میں صدر ہسپتال میں موت ہو گئی۔ اہل خانہ کا الزام ہے کہ ڈاکٹروں کی لاپرواہی سے بھائی کی موت ہوئی ہے۔ ان کے مطابق صحیح علاج ہوتا تو بھائی کی جان بچ سکتی تھی۔
اہل خانہ کے مطابق رات ساڑھے بارہ بجے بھائی کو الٹی اور سینے میں درد شروع ہوا۔ اس کے بعد انہیں فوراً صدر ہسپتال میں بہتر علاج کے لئے داخل کیا۔ مگر اس وقت پورے ہسپتال میں صرف ایک ڈاکٹر تھا، جو مریض کی صحیح تشخیص نہیں کر پایا اور بھائی کی موت ہو گئی۔
اہل خانہ کا الزام ہے کہ واقعہ کے بعد ڈاکٹر سمیت دیگر ملازم ہسپتال سے بھاگ گئے۔ واقعہ کی خبر ملتے ہی اہل خانہ ہسپتال میں آنے لگے تب تک پولس بھی پہنچ گئی۔ پولیس نے بتایا کہ معاملہ کی جانچ کر کارروائی کی جائے گی۔
ادھر ہسپتال کے ایک ڈاکٹر علی حسن نے بتایا کہ مریض پہلے سے ہی نازک حالت میں ہسپتال میں داخل ہوا تھا۔ ان کا کہنا ہے کہ انہوں نے پوری کوشش کی لیکن دس منٹ کے اندر ہی مریض کا انتقال ہو گیا۔
مقامی لوگوں کا الزام ہے کہ صدر ہسپتال میں ڈاکٹر کی کمی ایک بڑا مسئلہ ہے۔ ایک عرصے سے یہاں کی عوام بہتر علاج نہ ہونے سے اپنوں کو کھوتی جا رہی ہے، انتظامیہ بھی حکومت کے سامنے ان مسائل سے آگاہ کرتی رہتی ہے مگر حکومت کی بے توجہی جوں کا توں برقرار ہے۔
