نوئیڈا میں ٹریفک جام، جائزہ لینے کمشنر از خود پہنچے

کسانوں کی تحریک کی وجہ سے قومی راجدھانی دہلی اور غازی آباد شاہراہ بند ہونے سے ٹریفک کا دباؤ کافی حد تک نوئیڈا پر پڑ گیا ہے۔

کسانوں کے دھرنے اور غازی آباد شاہراہ بند ہونے کے سبب نوئیڈا میں ڈی این ڈی و دیگر شاہراہوں پر جام کے سبب لوگ گھنٹوں ٹریفک جام میں پھنسے رہے۔

پیر کو نوئیڈا میں اس قدر ٹریفک جام اور افراتفری کا ماحول تھا کہ جائزہ لینے کے لئے خود کمشنر کو پہنچنا پڑا۔

پولیس کمشنر آلوک سنگھ ڈی این ڈی پہنچے اور معائنے کے بعد ٹریفک سے وابستہ پولیس افسران کو ضروری ہدایات پر عمل کرنے کو کہا، وہیں انہوں نے عوام کو بھی صبر کا مظاہرہ کرنے کی تلقین کی۔

انہوں نے کہا: ’’جلد بازی اور عجلت میں گاڑیاں بے ترتیب ہو جاتی ہیں جس سے ٹریفک متاثر اور جام کی صورت پیدا ہو جاتی ہے۔‘‘

انہوں نے عوام سے صبر کا مظاہرہ کرنے اور ٹریفک کی روانی کو یقینی بنائے رکھنے کے لیے انتظامیہ کو تعاون دینے کی اپیل کی۔