ریاست اترپردیش کے ضلع گوتم بدھ نگر نوئیڈا میں کورونا وائرس، بلیک اور وائٹ فنگس کے بعد اب ایم آئی ایس سی (ملٹی سسٹم انفلیمیٹری سنڈروم) نامی بیماری میں مبتلا 11 مریضوں کی تشخیص کی گئی ہے۔
یہ بیماری کم عمر بچوں میں ہی پائی جا رہی ہے۔ نوئیڈا میں اب تک 11 مریض سامنے آ چکے ہیں۔ ان سب کا علاج نوئیڈا میں واقع نجی اسپتال میں جاری ہے۔ جن میں سے 7 مریض صحت یاب ہوکر گھر بھی جا چکے ہیں، جبکہ 4 مریض ابھی بھی زیر علاج ہیں۔ وہیں جن بچوں میں یہ بیماری پائی گئی ہے وہ پہلے سے ہی کورونا میں مبتلا تھے۔
ضلع کے چیف میڈیکل آفیسر دیپک اوہری نے بتایا کہ ضلع میں ملٹی سسٹم انفلیمیٹری سنڈروم (ایم آئی ایس سی) کی بیماری صرف بچوں میں پائی جا رہی ہے۔ نجی اسپتال میں 11 بچوں میں اس مرض کی تشخیص ہوئی ہے۔
انھوں نے کہا کہ ان بچوں کا پہلے سے ہی کورونا کا علاج چل رہا ہے۔ جبکہ 7 مریضوں کو علاج کے بعد اسپتال سے ڈسچارج کر دیا گیا ہے۔ 4 مریض اب بھی اسپتال میں زیر علاج ہیں۔ اس بیماری کی فی الحال تحقیقات کی جارہی ہے کہ ایا یہ بیماری صرف کووڈ19 سے متعلق ہے یا پہلے سے چل رہی ہے۔
ڈاکٹر اوہری کا مزید کہنا ہے کہ یہ بیماری زیادہ مہلک نہیں ہے۔ تاہم صحیح علاج حاصل کرنا بہت ضروری ہے۔ اس بیماری کی وجہ سے بچوں میں سانس لینے میں دقت آتی ہے، جبکہ بہت سارے بچے بھی معمول کے مطابق رہتے ہیں۔ اس بیماری کے علاج کے لیے ((ivig) انجیکشن کی ضرورت پڑتی ہے۔
