اترپردیش کے ضلع مظفر نگر میں کورونا وائرس کے انفیکشن کو قابو میں کرنے کے لیے ضلع انتظامیہ متعدد اقدامات کر رہی ہے۔ اس کے باوجود ہر روز کورونا کے سینکڑوں مریض سامنے آرہے ہیں اور بہت سے مریض اس وبا کی وجہ سے فوت بھی ہو رہے ہیں۔
وبا کی وجہ سے مرنے والوں کی تعداد میں بھی اضافہ ہو رہا ہے۔ اس کی وجہ سے ضلع مظفر نگر میں نئی منڈی شمشان گھاٹ میں آخری رسومات ادا کرنے لیے جگہ خالی نہ ہونے سے شمشان گھاٹ کے عہدے داروں نے کئی لوگوں کو آخری رسومات ادا کرنے سے روک دیا۔
کچھ لوگوں نے تو جگہ کی کمی کی وجہ سے خالی مقامات پر ہی اپنے رشتے داروں اور لواحقین کی آخری رسومات ادا کی۔
نئی منڈی شمشان گھاٹ کے صدر سنجے متل نے بتایا کہ شمشان گھاٹ پر مسلسل درجنوں سے زائد کی تعداد میں لوگ اپنے رشتے داروں اور اہل خانہ کی لاشوں کو لے کر پہنچ رہے ہیں لیکن آخری رسومات ادا کرنے والا چبوترا خالی نہ ہونے پر ان کو لوٹا دیا جا رہا ہے۔
انہوں نے کہا کہ ان کے ذریعہ نئی منڈی شمشان گھاٹ پر تمام تیاریاں کر لی گئی ہیں، لیکن شمشان گھاٹ میں جگہ کی کمی کی وجہ سے اور چوکیوں کے خالی نہیں ہونے کی وجہ سے ہم آخری رسومات نہیں کر سکتے۔
