ممبئی میں ڈرگ مافیا کے خلاف ایک بڑی کارروائی کرتے ہوئے نارکوٹکس کنٹرول بیورو (این سی بی) کو مفرور انڈر ورلڈ ڈان دائود ابراہیم کے روابط کا اس وقت پتہ چلا جب ایجنسی نے ممبئی کے ڈونگری علاقے میں منشیات کی فیکٹری کا سراغ لگایا جسے کریم لالہ کا پوتا چنکو پٹھان چلا رہا تھا۔
این سی بی کے ایک عہدیدار نے نام ظاہر نہ کرنے کی شرط پر خبر رساں ایجنسی آئی اے این ایس کو بتایا ’’این سی بی کے ذریعہ جس چنکو پٹھان کو گرفتار کیا گیا ہے۔ وہ لالہ کا پوتا ہے، جو داؤد ابراہیم کا قریبی تھا۔‘‘
ذرائع کے مطابق لالہ ہی ممبئی کا اصل انڈر ورلڈ ڈان تھا۔
ذرائع نے مزید کہا کہ ’’یہ مافیا بنیادی طور پر پٹھانی گینگ چلا رہے تھےجن کے داؤد گینگ کے ساتھ بھی تعلقات ہیں۔‘‘
انہوں نے بتایا کہ ایجنسی نے فیکٹری میں منشیات کی ایک بڑی کھیپ، ایک کروڑ روپے نقد رقم ضبط کرنے کے علاوہ کچھ اسلحہ بھی برآمد کیا ہے۔
ذرائع کا دعوی ہے کہ سنگھو پٹھان کا ساتھی عارف بوجھوالا مہاراشٹرا میں منشیات کا سب سے بڑا سپلائر ہے۔
