تہواروں کے پیش نظر پولیس کا سخت حفاظتی بندوبست

مہاراشٹر کے دار الحکومت ممبئی سے متصل شہر ممبرا میں گزشتہ کی طرح اس سال بھی محرم میں دس دنوں تک مجلس اور جلسوں کا انعقاد عمل میں آتا ہے، تو وہیں گنیش مورتی کو بھی دس دنوں تک بٹھایا جاتا ہے، آخری دسویں روز گنپتی کو وسرجن اور تعزیہ کو ٹھنڈا کیا جاتا ہے ایسے میں پولیس کی ذمہ داریاں کچھ زیادہ ہی بڑھ گئی ہیں۔

ایسے میں ممبرا پولیس نے شہر کے ذمہ داران، گنیش منڈلوں،انجمنوں کے رضاکارو ں، سماجی و سیاسی نمائندوں کی ایک میٹنگ طلب کی۔ اس موقع پر پولیس نے شہر میں امن قائم کرنے پولیس کا تعاون کرنے کی اپیل کی۔ اور اس بات پر زور دیا کہ کسی بھی قسم سے عام شہریوں، مسافروں، راہگیروں کو پریشانی نہ ہونے پائے۔ پولیس کی جانب سے بتایا گیا کہ انکی سوشل میڈیا پر کڑی نظر ہے کسی بھی قسم کی نفرت پھیلانے والے میسجیس یا امیجیس کو برداشت نہیں کیا جائے گا، اور ان کے بھیجنے والوں پر فوری کاروائی ہوگی۔